進入結局周嘅《廉政狙擊》星期六就會播出兩小時大結局，除咗屠敏( 胡定欣 飾)嘅真正身份「洛子欣」將愈來愈浮出水面， 「Martin」真身亦會曝光。韋繼明( 王浩信 飾) 、同ICAC章Sir( 譚俊彥 飾)亦一直懷疑卓廷光( 黃智賢 飾)喺O記同ICAC都有人協助佢受查期間甩身。

卓廷光每次都安然甩身，令一眾調查單位都非常懷疑有內鬼

為將卓廷光繩之於法，章Sir召集特別行動組，指派子峰( 黃宗澤 飾)同小黃( 戴祖儀 飾)秘密展開調查，得悉ICAC中有化名「Martin」嘅內奸同廷光內應外合，仲鎖定黎主任( 胡渭康 飾)為嫌疑人。不過原來事件並非佢哋想像中簡單，卓廷光等人口中嘅「Martin」原來唔止一人，牽涉者真實身份更超乎想像… 

黎主任成為ICAC懷疑嘅內奸，不過原來事實更為複雜

另一邊廂，一心要向卓廷光報冧樓之仇嘅屠敏亦快馬加鞭，佢先約自殺不遂嘅繼明到放滿冧樓亡靈嘅佛堂，苦勸對方振作之餘又表露自己係子欣嘅身份，最終繼明決定力撐屠敏，辭去O記職務並利用好友以凡( 吳卓羲 飾)埋卓廷光身打探線索。繼明計劃雖然得逞，不過深謀遠慮嘅卓廷光一早對佢生疑，繼明更幾度身陷險境…

屠敏為咗報仇，亦都加速佈局

之前《廉政狙擊》喺內地播出時引發熱議嘅床戲，亦將喺星期一晚(20號）一集播出。劇情講述同子峰拍拖嘅曉山( 蔡思貝 飾)因覺得同子峰遲遲未有進展，同時子峰母親群姐( 黎燕珊 飾)又心急抱孫，所以夾埋「未來新抱」度橋灌醉子峰，令佢哋之間生米變熟飯。子峰翌晨被曉山嘅鼻鼾聲嘈醒之後，驚覺自己酒後亂性…

恨抱孫嘅阿媽＋恨拍拖嘅痴＝直男受害

而原來呢場床戲，係黃宗澤(Bosco)同導演即興創作，Bosco早前同王浩信接受電台節目訪問時，就自揭臨時要求加床戲背後真相喇：「其實劇本本身冇嘅，只係有類似嘅嘢，咁我就同導演講點樣場戲可以好睇啲，因為套劇太沉重，但我覺我屋企嘅戲可以輕鬆啲，因為有個搞事嘅阿媽，又有個傻大姐蔡思貝。我哋係咁傾係咁傾，講到話我阿媽成日好想我成家立室，我就話不如個阿媽同未來新抱夾計去搞呢件事出嚟啦，導演聽完都覺得好新鮮，仲話：『好少咁拍喎，不如試吓』。之後導演就返去寫咗出嚟。」

Bosco仲話到拍攝當日都繼續為呢場戲 「加料」：「我加咗做節嗰part，我問：『咁好餸嘅？發生咩事？』跟住就度咗話不如勞動節，勞動節都做節？都幾得意吖！」說畢節目主持阮兆祥等隨即笑到碌地。Bosco仲話：「其實醒番嗰幕都係臨時度出嚟，我哋都係想大家睇咗覺得好笑。」

《廉政狙擊》星期一至五晚 21:30 翡翠台

踏入結局周嘅《廉政狙擊》劇情去到白熱化階段，卓廷光( 黃智賢 飾)因為有外號「Martin」嘅內鬼滲透執法機構，令佢每次都可以成功脫身，而並非只得一個人嘅「Martin」，今晚開始將會陸續現身，除咗日前已經露出馬腳嘅黎主任( 胡渭康 飾)之外，喺劇集開頭同中段簡短出場嘅 陳展鵬 竟然亦係其中一人。陳展鵬飾演嘅O記總警司畢Sir，同卓廷光有一段不為人知嘅悲慘過去，佢哋互相扶持同幫助下捱過困境，既係摯友亦為戰友。

噚晚一集，繼明( 王浩信 飾)喺以凡( 吳卓羲 飾)屋企憑一支煙頭鎖定畢Sir「Martin」嘅身份，今集繼明將借故向畢Sir投誠，企圖套取更多線索。不過畢Sir未有上當，反而致電廷光著其小心防備。

而喺劇組發布嘅宣傳照中，今、明兩晚展鵬將大顯視帝功架，憑幾個眼神同表情，細緻演繹出盤算、陰險同沉著應戰等唔同狀態，尤其面對廷光試探時，展鵬略帶點擔憂嘅眼神，加上一句義氣對白：「冇你就冇我，點還都還唔晒」更加搶戲。

陳展鵬竟然都係「Martin」其中一員，到底佢係正係邪呢？

不過畢Sir其實並非同表面一樣見利忘義，佢喺超危急關頭將扶助前下屬繼明一把，仲換嚟悲慘下場。到底畢Sir係良心發現回頭是岸定係另有原因？今、明兩晚嘅第23、24 集會有答案。

而劇組亦曝光第24集羅霖同高鈞賢跳海場面嘅拍攝花絮，為拍攝多場船上戲，劇組前後總共租用至少六艘大小不同船隻，包括有醫護人員駐守嘅救生艇；負責運送工作人員、演員同物資嘅小駁艇、負責「出鏡」嘅遊艇同快艇；仲有作拍攝基地嘅大船。

而喺第24集播出嘅「羅霖跳海」場面，雖然只得分多鐘，不過就花費大半日時間拍攝，根據拍攝花絮所見，羅霖、黃智賢同高鈞賢身處搖晃不斷嘅遊艇，頭髮被大風吹亂之餘，羅霖仲辛苦到苦笑，至於Ben就不停搞爛gag。

一場墜海戲令幾位演員搖到頭都暈，不過Matthew就非常自在，仲可以如常用手機覆Message

三人之中，以Matthew最淡定，仲全程低頭覆message！佢仲話：「依家做緊自己嘅服裝品牌，所以覆message係好緊要嘅。同埋場戲我唔係好多對白，最緊要係安全救到阿媽，同埋好 認真咁跳落海度。」

Matthew又感激劇組貼心安排：「佢哋安排得好好，我記得以前拍過一次落海戲，嗰時踩咗十五分鐘水，但係冇救生員傍住， 嗰時喺海度飄吓飄吓，我會有好多幻想，會諗有鯊魚或突然抽筋點算。但《廉政》就有晒潛水人員喺度準備，所以場戲拍得好順利。」 

而Candy就透露因不諳水性故由替身代勞，自己只需上陣演出水中掙扎戲份，佢又話拍攝跳海劇 前，因現場大風又大浪，雖然有阿仔Mathew傍住，依然狀況百出：「我企都企唔穩，跣低咗幾次，仲畀石頭擦損腳，飲咗好多啖海水。跟住我返到屋企就肚屙喇，可能同飲咗海水有關，但見到拍出嚟效果好，都值得喇。」