/public/article/images/202303/074780d4-791f-4b6f-9d18-5b73cd8e70ff.jpg)
進入結局周嘅《廉政狙擊》星期六就會播出兩小時大結局，除咗屠敏( 胡定欣 飾)嘅真正身份「洛子欣」將愈來愈浮出水面， 「Martin」真身亦會曝光。韋繼明( 王浩信 飾) 、同ICAC章Sir( 譚俊彥 飾)亦一直懷疑卓廷光( 黃智賢 飾)喺O記同ICAC都有人協助佢受查期間甩身。
為將卓廷光繩之於法，章Sir召集特別行動組，指派子峰( 黃宗澤 飾)同小黃( 戴祖儀 飾)秘密展開調查，得悉ICAC中有化名「Martin」嘅內奸同廷光內應外合，仲鎖定黎主任( 胡渭康 飾)為嫌疑人。不過原來事件並非佢哋想像中簡單，卓廷光等人口中嘅「Martin」原來唔止一人，牽涉者真實身份更超乎想像…
另一邊廂，一心要向卓廷光報冧樓之仇嘅屠敏亦快馬加鞭，佢先約自殺不遂嘅繼明到放滿冧樓亡靈嘅佛堂，苦勸對方振作之餘又表露自己係子欣嘅身份，最終繼明決定力撐屠敏，辭去O記職務並利用好友以凡( 吳卓羲 飾)埋卓廷光身打探線索。繼明計劃雖然得逞，不過深謀遠慮嘅卓廷光一早對佢生疑，繼明更幾度身陷險境…
之前《廉政狙擊》喺內地播出時引發熱議嘅床戲，亦將喺星期一晚(20號）一集播出。劇情講述同子峰拍拖嘅曉山( 蔡思貝 飾)因覺得同子峰遲遲未有進展，同時子峰母親群姐( 黎燕珊 飾)又心急抱孫，所以夾埋「未來新抱」度橋灌醉子峰，令佢哋之間生米變熟飯。子峰翌晨被曉山嘅鼻鼾聲嘈醒之後，驚覺自己酒後亂性…
而原來呢場床戲，係黃宗澤(Bosco)同導演即興創作，Bosco早前同王浩信接受電台節目訪問時，就自揭臨時要求加床戲背後真相喇：「其實劇本本身冇嘅，只係有類似嘅嘢，咁我就同導演講點樣場戲可以好睇啲，因為套劇太沉重，但我覺我屋企嘅戲可以輕鬆啲，因為有個搞事嘅阿媽，又有個傻大姐蔡思貝。我哋係咁傾係咁傾，講到話我阿媽成日好想我成家立室，我就話不如個阿媽同未來新抱夾計去搞呢件事出嚟啦，導演聽完都覺得好新鮮，仲話：『好少咁拍喎，不如試吓』。之後導演就返去寫咗出嚟。」
Bosco仲話到拍攝當日都繼續為呢場戲 「加料」：「我加咗做節嗰part，我問：『咁好餸嘅？發生咩事？』跟住就度咗話不如勞動節，勞動節都做節？都幾得意吖！」說畢節目主持阮兆祥等隨即笑到碌地。Bosco仲話：「其實醒番嗰幕都係臨時度出嚟，我哋都係想大家睇咗覺得好笑。」
《廉政狙擊》星期一至五晚 21:30 翡翠台
