入行40周年嘅 林敏驄 舉行兩場作品展音樂會，星期六起一連兩場喺西九文化區舉行，仲有唔少老友上台幫手擔任嘉賓，好似 太極樂隊 嘅 雷有暉 鄧建明 曾比特 露雲娜 江欣燕，仲有年青一輩嘅 鍾柔美 文凱婷 關嘉敏 當然唔少得《下流上車族》嘅車家成員 江美儀 郭柏姸 羅毓儀 同 黃嘉雯 鄧智堅 黃建東 啦。

佢哋同驄歌喺現場演繹返多首耳熟能詳嘅歌曲，其中B哥哥唱完《愛在深秋》轉身時不慎跌倒，反應超快嘅驄哥就即時以幽默為對方化解尷尬，而亦幸好佢未有受傷。事後受訪時，阿驄仲繼續話以為B哥哥係跪拜自己，真係俾佢激死呀。

《下流》嘅一班成員呢日都隆重其事，美儀姐仲轉全新造型出現合唱《常在我心間》  ，而蔓蔓 羅毓儀 就帶埋結他上台同Daddy Jam過，十足十東京街頭嘅少Busker一樣，事後仲話又驚又緊張呀。至於被網友封為「魔音」嘅芊芊，呢日就喺大家包圍支持下一齊跳住唱出跳舞街，雖然歌喉仲有唔少進步空間，不過聽起嚟魔性就已經大幅減弱喇。

Rosita事後就話擔心係台下觀眾錫住自己先讚唱得唔錯，又懷疑大家係講White Lie氹自己開心喎。而Yumi同Aeren就以青春氣息為大家再演繹多一次《跳舞街》，東東就自彈自唱重現阿驄嘅經典改詞歌曲《酒杯敲你個頭》喇。 

雖然車太在場，不過阿驄就照樣話知你，同 黃嘉雯 甜蜜合唱《想你》，而Mike就特別練習經典歌《假如》以超高音演出呀。

創作人林敏驄呢晚舉行40周年作品展尾場，鍾鎮濤、太極樂隊、李思捷、江欣燕、郭柏姸、江美儀、羅毓儀、鍾柔美、曾比特及文凱婷等輪流上台唱歌，而胡楓、薛家燕、苗僑偉及戚美珍等前來捧場，全場座無虛席。

好友李思捷擔任嘉賓獻唱搞笑歌《我愛呃蝦條》，分別以張學友及鄭少秋唱腔演繹，李思捷與林敏驄上台唱《最愛的你》，鍾鎮濤（阿B）頭場不慎跌倒，呢日拎住拐杖撐場唱《誠懇》，B哥哥表示有啲「揸拿」好啲：「一陣唔知阿驄拎啲咩出嚟噴，都有得同佢撐吓。」

三哥苗僑偉驚喜登台，笑指阿驄鬼馬風格，對樂壇有兩大貢獻，第一係寫咗好多好歌、第二係佢冇加入做歌手，阿驄反駁：「我唱得好對呢個世界係好唔公平。」苗僑偉又指第一次睇演唱會見到歌手喺度散步。

有「魔音」之稱嘅郭柏姸，盡情唱跳《跳舞街》，唱畢即問「車總」評語，林敏驄笑稱不予置評，眾人完場前大合唱陳百強金曲《深愛著你》，之後眾人轉場出席慶功宴，阿驄出場獲台前幕後拍手賀Good Show，阿驄完騷笑指要去「搵我唔島」瞓3日，羅毓儀爆阿驄見到佢哋《下流上車族》一家人出場時有啲眼濕濕。

問到郭柏姸有冇成功「驅魔」，阿驄話要睇「魔音」定義：「佢好好㗎啦！以佢咁嘅資質，蔓蔓直情冇得頂。」羅毓儀聽到阿驄讚自己表現好，即碰酒杯以示多謝，阿驄講明考慮原班人馬開Part 3！