王祖藍 有份成立嘅經理人同製作公司，日前喺東莞舉行春茗，當日旗下香港同內地藝人都盛裝赴會，除咗祖藍一家四口現身紅地氈之外，嘉賓黎瑞恩 林曉峰 岑麗香 鄺文珣一家三口 同拍檔多年嘅「福祿壽」阮兆祥 李思捷 都有現身，佢哋仲宣佈將重組舉行世界巡迴騷呀。
祖藍首次同埋囡囡一家四口行紅地氈，太太 李亞男 悉心打扮出現，而大女Gabby同細女Hayley，就以粉紅「姊妹裝」亮相，Gabby全晚拎住「企鵝仔」滿場飛，而Hayley就喺紅地氈大行Catwalk，仲不時向大家派心心，非常可愛。
已經係兩女之母嘅Leanne又提到自己身形Fit到漏嘅秘密，佢話指除咗均衡冋清淡飲食之外，仲有「萬年牛仔褲」同「湊女」兩大方法俘持苗條。至於囡囡Gabby手上嘅「企鵝仔」，Leanne就話係佢近日「新寵」：「佢以前鍾意恐龍，依家鍾意企鵝，佢手上面拎住嘅係佢新嘅企鵝袋，佢好鍾意，去到邊就要攞到去邊。」
而祖藍就同祥師兄仲有思捷宣布，成立16周年嘅「福祿壽」將舉辦全球演唱會同以模仿為主題嘅綜藝節目。祖藍話：「本身演唱會喺15周年已經想搞，不過因為疫情所以就順延到今年先搞，呢個演唱會計劃係全球性，首站應該係我鄉下東莞。另外今年都會喺大灣區度搵模仿達人，希望可以宣揚模仿文化，等大家知道模仿其實係要好認真先做到。」
祖藍宣布開演唱會後反應熱烈，有份赴會嘅鄺美雲仲即時話要包場，祖藍話：「仲有我東莞嘅前輩都話要包場，好多謝大家。」祖藍仲話喺鄉下東莞為香港同內地公司舉行春茗別具意義：「東莞係我鄉下，我同鄉下啲親戚同埋對呢個地方都好有感情，亦想趁住今次呢個活動順便宣傳吓東莞。」