身形fit爆，已為一女之母嘅 Lena李天縱，喺劇集《隱形戰隊》中飾演恐怖份子古思，而喺21號晚播出嘅一集入面，仲同馬國明、唐詩詠連場埋身肉搏戲，仲要畀人打臉、夾頭同踢肚。
但原來拍呢套劇時，Lena係啱啱生完BB冇耐，佢喺訪問入面自爆：「接到這個角色是坐完月子幾個月後的事，生寶寶的事情我當時沒有對外公開，所以Jazz（即監製文偉鴻）並不知情。」Lena話由於Jazz係親自聯絡佢，仲好耐心咁同佢講劇情，對於監製咁尊重演員，加上了解完劇情同角色之後，Lena就覺得再辛苦都想接呢個角色。而為咗演好呢個角色，Lena喺正式拍攝前，專誠跟武術指導學揸槍同埋身格鬥，而監製亦要求佢私下要keep住練習，以拍出最佳效果，Lena說：「我記得其中一個吊威也鏡頭，拍了足足五十次。」
講到同馬明、詩詠嘅對打戲，Lena就大讚佢哋專業，又透露拍攝當日有場戲要佢騎喺馬明膊頭上面同佢糾纏同打鬥，Lena話呢組動作佢哋都唔知拍咗幾多次，每次拍完馬明都會鼓勵自己：「加油，我們再來一次」而每次當Lena有危險動作時，馬明又會特意保護佢，讓Lena非常感動同欽佩。除咗為角色做訓練外，Lena仲刻意將自己嘅長髮剪短，配合角色嘅要求訓練眼神同氣場，希望畀觀眾睇到唔同嘅自己。
而呢晚嘅劇情入面，馬明飾演嘅Ocean同詩詠飾演嘅寶寶，喺炸彈威脅下仲可以不斷向觀眾撒糖，Ocean堅持唔會掉低拎住炸彈嘅寶寶，兼講出「愛的宣言」話要同對方一齊變老，雖然甜到都就嚟有糖尿，但觀眾對馬明詩詠呢對CP嘅灌入式蜜糖就相當受落，仲讚佢哋嘅情深又悸動嘅眼神交流，感動得嚟又浪漫呀！
《隱形戰隊》星期一至五 20:30 翡翠台
