TVB綜藝歌唱真人騷《中年好聲音》逢周日晚8點半翡翠台播出，自播出以來，《中年好聲音》除咗收視節節上升，網上曝光及觀看率亦先後報捷，截至剛過去周末，《中年好聲音》網路平台曝光率超過2億，觀看率接近3,000 萬，成績斐然。
本周日（26日）晚播出第17集，將進入十強激戰首個回合《煇黃經典》，賽制方面亦有新玩法，由今個回合開始，緊接之後連續三個回合均增設累積排名分，每個回合獲得第一名嘅選手，可獲累積排名分10分，第二名的選手則可獲9分，如此類推，每個回合均會選出回合MVP，獲MVP殊榮者可額外獲得2分。每個回合累積排名分數最低選手將被直接淘汰，如出現累積排名分同分情況， 該回合最低分者會被淘汰；換言之經過四個回合比賽後，最終將剩下六強選手。
十強首個回合出場序將根據參賽者年齡由高至低排起，故此第17集打頭陣者將係大熱門吳大強Bill哥哥，是集歌單為吳大強《L.O.V.E.》、丁文俊《網中人》、李佳《上海灘》、顏志恒《摘星》、龍婷《焚心以火》、涂家堯《當年情》、林鉫徫《問我》、羅啟豪《奮鬥》、支嚳儀《愛定你一個》及周吉佩《畫出彩虹》。以「療愈」見稱嘅Bill哥哥，是次搖曳台風歸位又唱又跳之餘，更大送心心，非常討喜。雖然Bill哥哥傾情獻唱，但評審們卻唔多受落，出名嚴格嘅嘉賓評審舒文便直指Bill哥哥欠變化：「成件事最要好啲係La La La嗰段，因為La擺得太低，變咗好似好慢好悶咁。」周國豐直指Bill哥哥關鍵失分係「一個頂幾個」，笑言應該請四名仔仔助陣：「一個人頂晒呼吸方面會出現難題，不如你搵埋你嗰四個仔喺後面幫手，佢哋唔唱，淨係La La La同幫手跳舞，畫面都肯定好正。」到底Bill哥哥最終會唔會因一時失手大熱倒灶呢？
今集賽果可算係出人意表，除咗Bill 哥哥，另外三位人氣選手顏志恒、林鉫徫及周吉佩亦先後出狀況，一心以勵志Tone獻唱《摘星》嘅顏志恒，雖然想以歌詞「星遠望似高， 卻未算高，我定能摘到」強調勇敢追夢嘅心，可惜卻編曲時未有留意歌詞中嘅故事而滑鐵盧，周國豐解釋唔可以隨便改結構，影響咗故事，帶唔出應有嘅 Message，伍仲衡批評有時改咗啲Phrasing好怪，又唔會令首歌好聽咗，肥媽直指志恒咬字有問題，至於自彈自唱、Rock 爆上陣嘅周吉佩，雖然表演極盡視聽之娛，卻因選錯Key失唔少分數，並遭舒文即場要求升一度重唱一段，情況同樣令人擔心。
早已被認定係唱得之人嘅林鉫徫，是集將告別招牌「肉緊」及「壓逼感」，轉Style以甜美風獻唱《問我》，雖然笑容甜美兼傳遞出滿滿正能量，但肥媽似乎並唔受落，搞笑叫鉫徫「唔好玩嘢」：「首歌真係唔係你（唱開嗰種），我都要望吓你係咪搞錯咗！依家嚟到10強唔好玩咁多嘢，你仲要再吊起咗把聲，問我乜乜乜， 邊度好聽啫；你要有你自己，聽到我毛管都戥埋。」肥媽邊說邊歌癮大發，模仿鉫徫以嬌俏Tone唱幾句《問我》，臨場加演「數白欖版」；雖然肥媽玩得開心，卻遭舒文潑冷水，稱好彩肥媽頭先扮嗰個聲唱兩句，唱多一句，舒文就會「動殺機」！
《中年好聲音》逢周日晚 8 點半翡翠台播映