27號起一連四星期、逢星期一至星期三晚22:30，翡翠台將推出全新「無框架」綜藝節目《成人教科書》，透過升呢任為人父嘅 洪永城 同23位小朋友相處，帶領觀眾突破傳統思維框框，喺冇標準答案下跳出常規、開啟思維發掘可能性；帶出家長、生活同日常行為就係一本行走教科書嘅道理，小朋友不斷閱讀先得以成就更全面成長。
節目中「成人」二字代表為成人而設，同時都代表探討每人成長嘅必然經歷。 「成人教科書」冇標準答案，只有四大對立主題：「男女」、「你我」、 「生死」同「美醜」，首星期探討嘅主題係「男女」，大眾自以為有絕對概念嘅「男女」二字，點樣喺三集節目當中探討可能性同多樣性？
製作組安排多個有趣任務令觀眾更具體了解 「男女」嘅伸延性，包括「姓名競猜」、「空間處理能力」、「性別斷捨離」、「忍者運動」同「男孩扮靚室」等，每個任務結果亦出人意表。
喺「姓名競猜」挑戰中，節目邀請咗楊證樺、鄧英敏、黃梓瑋、李漫芬、黎瑞業同簡思恩六位擁有特別姓名嘅資深藝人，喺參與任務小朋友唔認識佢哋下，單靠姓名競猜「姓名持有人」，結果小朋友嘅答案接近九成出錯，情況有趣。
而「忍者運動」就極盡刺激，大家仲可一睹Tony「嗌救命」實錄。至於 「性別斷拾離」就引發爆喊事件，Tony同小朋友何朗怡嘅媽咪，喺製作組要求下將朗怡心愛嘅「肉桂狗」公仔同房中嘅粉色物件丟棄，結果令朗怡失控爆喊，更令Tony大感不知所措。
佢事後笑言：「我好驚見到女士喊，如果阿囡喊，我會即刻播Youtube又或者唱歌畀佢聽，以前當然係揦手唔成勢，依家經過一段時間嘅音樂洗禮，我準備下屆參加《中年好聲音》。老婆喊更加嚴重，我哋成日話《成人教科書》冇標準答案，但係我領悟到做老公有標準答案，就係一定係佢啱架喇， 佢話一加一等於三，就係三。」
為令來自唔同背景同唔同性格嘅小朋友加入「探索多樣可能性」之旅，製作組花接近一年時間；面試超過70位小朋友同家庭，十二集拍攝則花近半年時間進行資料搜集同拍攝，製作認真。
23位陸續現身嘅小朋友各有特色，有循規蹈矩乖乖女、貪靚萬能男、豪邁低調女、嘴Gel Gel得意妹、慢半拍佛系女等。 而人生閱歷相對豐富嘅「旅遊達人」Tony同小朋友合作，佢就話好開心可以同佢哋一齊成長：「啲小朋友好得意，好開心佢哋全部拍完呢個節目之後都大膽咗同埋自信咗，更加了解自己嘅長處，我相信呢個亦係製作組想做到嘅效果。」
至於第一星期嘅任務，Tony就指唔止「男女」強弱難以定奪，就連成年人同小朋友之間嘅強弱亦一樣，佢話：「好似忍者運動咁，我根本仲渣過啲小朋友。製作組亦好有心，每集都會提供同主題相關嘅冷知識，令我自己都腦洞大開咗。」
《成人教科書》3月27號起 星期一至三晚22:30 翡翠台