2019年因牽涉名下夜店性招待醜聞同毒品等案件，由神壇跌倒嘅韓國男團BIGBANG前成員勝利，當時被軍事法庭判處3年監禁同充公所得財產，而勝利亦正式聲明退出演藝圈，事件引發火燒連環船效應，多位牽涉其中崔鍾訓、李宗泫、朴有天等先後出事被捕引退。2021年時勝利提出上訴，改認所有控罪之餘，被改判1年6個月監禁。
上月已獲釋嘅勝利，有報道指佢出獄後仍與部份圈中人有聯絡，更相約一齊到夜店消遣瞬，不過日前佢被網友發現，同早喺2018年已傳出緋聞嘅韓國女網紅 李惠媛 同遊泰國，更被指入住當地高級酒店。不過轉頭勝利原來已經轉到香港，星期日被發現喺尖沙嘴海傍現身，晚上又喺中環一酒店同朋友飯聚，亦大方對鏡頭揮手，屬出獄後首次公開真貌。
2003年加入YG娛樂成為BIGBANG成員嘅勝利，交際手碗一流，十多年前已開設明星學校，向各大公司推薦練習生，又涉足飲食業，名下連鎖加盟拉麵店分店曾多達50間，之後又先後營運兩間夜店，亦因為以性招待生意夥伴同夜店涉毒等問題而惹上官司入獄。
(網上圖片)