進入最後4個回合嘅《中年好聲音》，星期日晚播出咗以煇黃金曲決戰嘅首回合，十強選手分別以唔同經典金曲迎戰，最後 李佳 以《上海灘》獲得呢集嘅最高分數同MVP，而丁文俊就因表現一般而被淘汰。
新賽制之下參賽選手以排名計算累積分數，目前李佳就以12分領先，而呢日外籍老公又突然現身送花祝賀，就令佢更為驚喜，仲話開心到都唔知點形容。而老公仲好Sweet咁大讚佢夠晒比心機，呢次勝出係完美到實至名歸咁話呀。

去到賽事末段，有人選擇兵行險著，有人就決定以穩陣為先，好似 周吉佩 呢日就被批評太穩陣而揀錯Key，仲被要求升Key重唱，事後就分數就暫列尾三喇。事後吉吉訪問時就話，過往都太過進取，不過因為臨近決賽尾段而想穩中求勝，不過就未得評判青睞喇。

大熱嘅 吳大強 以擅長嘅英文歌出戰，不過同樣被指未有強烈氣氛而分數麻麻，佢就話往後會再加留意，Bill哥哥仲話睇嚟下次要出動幾個乖仔幫手喇。

涂家堯嘅分數就更危險，處於淘汰邊緣嘅佢就似乎非常淡定，仲話比賽過程已經非常有得著喇。而呢集最低分嘅丁文俊就十強止步，出局收場嘅佢亦都指非常慶幸身為十強一份子，對自己亦都算有交待喇。

慈善籌款節目《萬眾同心公益金》6月3號晚圓滿結束，多位嘉賓為慈善落力表演，好似 炎明熹 《中年好聲音》嘅 周吉佩 李佳 龍婷 羅啟豪 顏志恒 吳大強 等，加埋 陳美齡 譚嘉儀 曾比特 朱主愛 余宗遙 鍾柔美 ，而近年甚少公開演出嘅 張德蘭 呢日亦罕有登台為慈善出力，仲話非常留意《聲夢》同《好聲音》參賽者嘅演出呀。

呢日唔少參與歌手都把握機會同佢合照，當中梗係唔少得Gigi啦，而Gigi仲大爆平時極少同藝人合照嘅姑丈，呢日都公開要求集郵，Gigi仲笑返怕醜姑丈轉頭呀。

Yumi好快就會踏入中學最後一年，近日正埋首溫習考試嘅佢，就話已經開始對來年嘅DSE感到緊張，仲話會好好安排時間準備，不過大家亦唔使擔心，因為佢同Gigi都好快會有新歌推出喇。

早前往美國登台開騷嘅 許志安 呢日都係表演嘉賓之一，佢亦現場獻唱新歌，受訪時亦提到重訪一廠見到現場觀眾令自己憶起當年，又指即將會喺新加坡開騷，亦正籌備香港嘅表演，不過估計就要出年先可以成事喇。

《中年好聲音》嘅幾位成員呢晚由過去嘅觀眾變成表演者，佢哋都覺得非常開心，仲話感覺非常有趣呀。羅啟豪呢晚就再同媽咪同台演出，不過羅媽媽就話非常緊張喇。龍婷同李佳呢晚亦大展歌喉，不過去到後台就變成小Fans同各位前輩見面合照喇。

新時代歌手阿Mike亦都同朱主愛仲有余宗遙合作，仲爆不時狂Loop朱主愛嘅網絡神曲咁話呀。