「風繼續吹 不忍遠離」4月1號係哥哥張國榮離世 20 周年，為紀念呢位已故樂壇巨星，無綫一連三個嘅星期六、日，推出以《永遠寵愛張國榮》為主題嘅特備節目，當中包括同名綜藝節目《永遠寵愛張國榮》、《勁歌金曲張國榮特輯》、 重播經典劇集《儂本多情》，及精選咗3套哥哥電影作品，包括音樂電影《永遠寵愛張國榮：日落巴黎》、《胭脂扣》同《阿飛正傳》，到時將會分別喺翡翠台同 J2播出，而當中嘅《日落巴黎》仲會有經數碼修復嘅高清版同4K 兩個版本。
另外無綫官方社交網「See Saw 先」亦搵嚟首屆《聲夢傳奇》嘅傳奇新星 Gigi炎明熹，以清唱方式獻唱哥哥嘅《為你鍾情》、《今生今世》、《風繼續吹》及《追》四首經典金曲，並於 30號 18:00 準時上架！
據知呢4首歌都係由Gigi自己挑選，而呢次獻唱仲會係「零修音」原聲直出，以素顏眼鏡 Look 上陣嘅 Gigi，被問到點解會以素顏示人？佢話：「因為 See Saw 先嘅觀眾睇得最多就係我呢個樣，我同工作人員都覺得咁樣出鏡可能對佢哋嚟講更有親切感。其實我都唔係好鍾意化妝出鏡，呢個係我最舒服嘅狀態。」呢次嘅致敬獻唱本身一早已經錄好咗，但係Gigi卻主動要求「重錄」，原因係Gigi當日覺得自己當時把聲爭啲，因為嗰日佢做完嘢有啲攰，所以就主動要求過幾日再錄過，對自己好有要求嘅Gigi，希望以最好嘅狀態向哥哥致敬。
而喺片段入面，大家除咗可以聽到Gigi清唱歌曲外，仲會睇到佢每次喺錄音前，都會認真研究最適合清唱嘅Key、最圓滿嘅演繹方法。由於Gigi對工作人員態度亦相當友善兼有禮貌，錄音期間又唔自覺咁顯示自己可愛一面，好似試key時眼仔碌碌咁諗點fine tune，錄音時又一再為自己認真打氣：「我可以嘗試嘅！」，完全將工作人員收服，難怪大家都封佢做「幕後開心果」。
