一連 13 集全新競技遊戲節目《真係唔好笑》將於4月1日起、逢周六晚9點45分翡翠台播映，由何廣沛、麥美恩、馮盈盈、郭子豪、 彭慧中、方紹聰（奶仔）及羅毓儀擔任主持，節目每集均會邀請不同嘉賓，與主持分成兩隊上演連串搞笑對決，各人要喺不同搞笑攻擊下忍住笑聲，一旦笑出來就要接受大懲罰！
周六（4 月 1 日）晚播出嘅第一集，嘉賓阮兆祥、丁子朗及游嘉欣，分隊名單分別「日隊夜隊」嘅阮兆祥、丁子朗、游嘉欣、彭慧中及奶仔，以及「最好唔好俾人隊」嘅麥美恩、何廣沛、馮盈盈、羅毓儀（Yuki）及郭子豪。
是集首個遊戲「笑話 Falling Down」已相當過癮，玩法係每隊派一個成員講笑話，另外一 隊嘅成員則站喺機關上，只要忍唔住笑就會跌落機關直踩石春墊。呢個回合「老鼠屎」絕對係游嘉欣同羅毓儀，兩位笑點極低經常忍唔住爆笑。
擅長食字爛Gag嘅阮兆祥表演魔術，佢拎住紙巾笑說：「信唔信我一秒鐘就可以將呢張紙變成動物？」佢講完將紙巾撕掉（意指獅子），當中只有 Yuki 對小學雞食字爛 Gag忍俊不禁；游游更加誇張，單單被人叫名字已經忍唔住笑出聲，極低笑點令人摸不着頭腦。至於「大隻仔」郭子豪表現亮眼，分別模仿阮兆祥招牌大笑及丁子朗扯蝦式笑聲，令對方連環失手爆笑。
另一環節「笑到噴血」，玩法係兩隊各挑對方一名隊員進行化妝大改造，五分鐘限定時間之後，同隊成員要喺擋板後含住「血水」忍笑，只要噴出「血水」即視為失敗，忍笑較多嘅一組勝出。當中兩位靚女馮盈盈及游嘉欣慘成糟質對象，身為港姐冠軍嘅盈盈被兜頭笠絲襪、整白成塊面、黐上「曱甴腳」眼睫毛及畫上大Red唇，靚樣崩壞相當可憐！至於深受宅男喜愛嘅游游，慘遭畫黑成塊面兼笠上黑色泳帽，之後臉上再被畫上幾個白點，游游「黑化」後似足人肉保齡球，喜感十足。兩位靚女被弄至面目全非，造型爆笑，但有一隊竟然能夠全員忍唔住笑，究竟邊一隊忍笑功力咁犀利？密切留意周六晚播出《真係唔好笑》。
《真係唔好笑》逢周六晚 9 點 45 分翡翠台播映