TVB熱播劇《隱形戰隊》噚晚（3號）呢集再有新個案，主角為大力（郭子豪飾）及大力中學師妹詩婷 （林凱恩Iris飾）。林凱恩憑《愛‧回家之開心速遞》Bonnie 成功入屋，是次角色相當有發揮，由學生妹開始演起，佢無論性格或造型均十分多變。林凱恩嘅學生妹造型雖然滿臉痘痘，由於傻更更又帶點純真害羞，入屋度高。
林凱恩飾演詩婷喺學生時期已係大力頭號「迷妹」，曾當眾向大力示愛，可惜因臉上暗瘡慘遭同學們取笑；當時滿臉委屈嘅詩婷喊得楚楚可憐，演技亦十分自然；網民大讚佢嘅眼鏡Look 可愛，角色設定頗有新鮮感，後來詩婷疑似捲入神秘組織及有吸毒惡習，不時會被指示作性感打扮及濃妝亮相，與平時侍應嘅清爽有禮Look截然不同，另外林凱恩角色遭遇，以及其與郭子豪有一段刻骨銘心嘅愛情故事，令觀眾睇得肉緊。
林凱恩坦言演呢個角色難度幾大：「今次角色最大挑戰係要將馬詩婷呢個悲劇人物經歷嘅所有嘢，喺短短幾集表達晒出嚟，既要畀人感受到佢遇到以前愛人嗰種喜悅同夢幻，亦都有好多其他唔同程度嘅複雜情緒要處理，所以要事前做好多功課。」林凱恩續指單係學生妹造型，已花咗唔少心思：「我自己最鍾意學生 Look，因為同以往嘅靚女造型唔同，想做到一種宅女迷妹嘅感覺，事先參考咗好多唔同角色，好似野田妹，造型上係特登設計得老土少少同埋化多啲痘痘，令到馬詩婷感覺更加冇自信。」 噚晚另一焦點劇情則為寶寶（唐詩詠飾）及 Ocean（馬國明飾）復合。
早前《隱形戰隊》記招因率先播映詩詠與馬明「激烈床戰」引發迴響，噚晚劇集相關部分正式出街後亦惹來熱討，原來該幕「火辣」床戲不單止加插「浪漫小屋」感人戲碼，最終卻因為嬌姐（程可為飾）亂入搞笑收場，原本被感動至落淚嘅寶寶，眼淚都仍未乾，便要趕著穿回衣服，忙亂間更著錯Ocean外套，場面尷尬。呢幕唐詩詠絕對過足戲癮，皆因當火辣床戲如箭在弦之際，竟先後爆出洋蔥及搞Gag戲碼，而唐詩詠嘅尷尬搞笑樣亦交足功課，再度搶焦成功。 
其實「浪漫小屋」已非首次閃現劇集，背後更有超感人故事，事緣當年寶寶向Ocean提分手時，曾親手毁掉Ocean為求婚專誠砌建嘅「浪漫小屋」；為咗補償被錯怪多年嘅Ocean，寶寶獨自一手一腳重建「真‧浪漫小屋」，欲向Ocean展示道歉誠意，當中陳設及裝修更與原本模型有八成相似，場面壯觀浪漫。據知劇組為咗相關場口，花咗半個月時間尋找「浪漫小屋」模型及與模型相似度甚高嘅陳設及裝修，相當有誠意。
《隱形戰隊》逢周一至五晚八點半翡翠台播映