一連八集嘅TVB資訊節目《LAW霸女神》將於4月6號起、逢周四、五晚10點半翡翠台播出，節目由森美、戴祖儀（Joey）、賴彥妤 （Vivienna）、魏韵芝（Joyce）及王嘉慧（Cathy）擔任主持，每集會邀請一位星級嘉賓坐鎮，嘉賓着唔同主題嘅情境短片發表意見，再由專業律師解說，為觀眾解開法律迷思與謬誤。
四大「真‧LAW 霸女神」位位有學歷，4位靚女主持皆係法律系高材生，分別係英國萊斯特大學法律系畢業嘅Joey、香港中文大學法律學院畢業嘅Cathy、英國倫敦政治經濟學院法律系畢業嘅Joyce， 以及英國高雲地利大學法律系碩士畢業嘅Vivienna，名副其實「真．LAW 霸女神」。
4位女神以 OL 造型上陣晒無敵長腿，更要扮鬼扮馬演出情境短片， 非常過癮。4 位女神每集亦參與解答問題，爭奪「終極LAW霸女神」寶座；周四（6 日）晚播出第一集，邀來視帝譚俊彥擔任嘉賓，主題係「家居法例 」。其中一條問題「門外攝錄鏡頭拍攝到鄰居出入情況是否違法？」，Joey解答：「如果係為Mark人哋嘅資料，可能會構成『不誠實意圖使用電腦罪』。」怎料Joey原來拋錯書包，李健志大律師更正係「不誠實意圖取用電腦」，後來李健志大律師講到香港法例第486章《個人資料（私隱）條例》 嗰陣，Joey再度失誤將「第486章」講成「第488條」，引來全場大笑，森美見狀即笑言：「LAW霸女神要逐你出去喇！」
香港人喜歡打麻將，其中一條問題「於私人地方以現金賭博，是否犯法？」，譚俊彥認為多過兩枱就犯法：「以前公公婆婆鍾意打麻雀，成日話唔好開第二枱，話如果有兩枱喺同一間屋就會犯法。」 至於真正答案係咪如譚俊彥所講？周四晚便會揭曉。
周五（7 日）晚播出嘅第二集，邀來方力申擔任嘉賓，主題係「婚姻」。是集最搞笑環節係其中一條情境短片請來林正峰客串，佢喺片中化身急色男瞞着太太與靚女玩 Cyber Sex，其間正峰脫去上衣晒肌肉，又搞鬼地表演震波。之後大家探討「對方不知情的情況下，安裝追蹤應用程式有否犯法？」，Joey稱若果呢個犯法係好多女仔都瀨嘢，森美即話：「你終於知道喇！」Joey隨即耍手擰頭回應：「冇做過冇做過，但身邊好多朋友都做過，同埋有某個 App 係個男仔畀人check咗都唔知，每個人嘅電話都有呢個App！」森美大哥聞言竟口快快爆料：「我知你講邊個喇！我老婆都係用呢個嘅！」場面搞笑。到底此舉係咪真係屬犯法行為？密切留意周五一集《LAW霸女神》。
《LAW霸女神》逢周四、周五晚 10 點半翡翠台播映
