TVB熱播劇《隱形戰隊》噚晚（4 日）呢集繼續圍繞「幸福學會逼良為娼」個案，隨住劇情推進，許素妍 （莊思明飾）及詩婷（林凱恩飾）真實身份曝光，表面係心理醫生嘅素妍，暗地係賣淫集團「幸福學會」主腦，詩婷係受害者之一。詩婷與大力擦出愛火花後，向素妍坦白欲退出學會，豈料招來殺身之禍，並喺酒店與幸福學會會員之一嘅游國堃（許俊豪飾）發生關係時身陷險境。
林凱恩劇集尾段險遭強姦及捏死一幕，更係未正式播出已引起迴響，噚晚另一重要劇情落喺趙希洛飾演POTT隊員阿Yan及CTRU隊員Ben Sir（胡諾言飾）身上。趙希洛喺POTT擔任支援角色，因為一次偶遇對Ben Sir產生好感，二人經過多番邂逅後感情突飛猛進……不過Ben Sir身份並唔簡單， 之前因Madam Fong（江美儀飾）一個錯誤決定不幸身亡嘅女臥底小柔（趙璧渝飾）正係Ben Sir前女友；雖然Ben Sir與Yan相處時鏡頭一再閃過小柔畫面，令人覺得 Ben Sir對Yan動咗真情，由於二人相處期間Ben Sir不時有意無意向Yan探聽情報，令人擔心 Ben Sir 接近Yan目的並不單純，由於監製向來擅長玩懸疑，加上《隱形戰隊》劇情重心忽然落喺之前毫不起眼嘅趙希洛與胡諾言身上，旋即惹起網民無盡揣測，直指結局周劇情好大可能驚爆有內鬼。
胡諾言角色無論行徑或自身故事背景均擺明有可疑，被列為內鬼嫌疑人毫無懸念，至於趙希洛則被指喺劇中一直只係行行企企並不合理，如今忽然戲份變重，更加令網民起疑心，此外，Shadow單戀Ocean（馬國明飾）失敗同樣「榜上有名」，事緣當Shadow得悉Ocean與寶寶（唐詩詠飾）熱戀後，眼神閃過一絲失意，令網民認為備受力捧嘅阿Moon理應再有突破。另同樣被列入內鬼名單仲有辛 Sir（吳家樂飾），與 Jazz 合作無間嘅吳家樂，之前憑《城寨英 雄》馮春美一角成為當時叱吒風雲嘅大奸角，不少網民均期待佢今次終極大反轉，以極邪惡反派登場，不過到底「真‧內鬼」誰屬，就有待留意劇情發展。
趙希洛於2019年憑《金宵大廈》何太角色榮獲「萬千星輝頒獎典禮」最佳女配角，之後再憑《金宵大廈 2》四爺及《十八年後的終極告白 2.0》嘅 Joyce等成功搶焦；由於相關角色較為鮮明極端，故是次 Candice 喺《隱形戰隊》中嘅專業紀律部隊角色相對「冇咁搶戲」。
不過噚晚呢集趙希洛可謂大逆襲，除咗出場次數及對白倍增，出場造型亦相當亮麗，無論壞車或是食蛋糕嗰幕，趙希洛笑容及眼神相當甜美，趙希洛指事先冇練習「甜美表情」，只係跟住劇本及角色性格發揮：「之前拍《金宵大廈》同《十八年後》都要練啲比較奸同恐怖嘅笑容， 同埋想盡量每一套劇都唔同，所以相對今次呢個角色係比就易啲，sweet同positive好多。」趙希洛透露首次飾演紀律部隊角色都係同Jazz合作： 「嗰套係《女警愛作戰》，今次都好開心可以同Jazz再合作，同上次最唔同係唔使着制服。希望將來都有機會可以着吓其他制服好似消防員咁。」
《隱形戰隊》逢周一至五晚八點半翡翠台播映