今個星期日(9號)播嘅《中年好聲音》，係爭入七強嘅第六部曲《友情合唱！淘汰選手助陣！》，八強參賽者邀請之前已被淘汰嗁選手一齊合唱作賽，仲邀請到資深歌手巫啟賢擔任呢集嘉賓評審。
喺第12集合唱《因為愛情》傳緋聞嘅龍婷同丁文俊，會再度合體獻唱《選擇》，龍婷以露肩裝上陣大晒知性美，丁文俊就官仔骨骨斯文有型，佢哋合唱期間不時深情對望，唱到高潮時仲十指緊扣，甜蜜指數爆晒錶，搞到主持 車婉婉 都笑言：「好似去咗一個婚禮咁！」又追問丁文俊：「龍婷揀你呀，有咩感想？」丁文俊就怕醜仔上身口窒窒話：「ER..ER…好多謝佢，打撈番我上嚟。」場面搞笑。
對於呢對粉紅泡泡周圍飛嘅演出，肥媽就話：「佢哋出嚟嗰時，我話：『嘩，結婚呀？』」丌張佳添就大讚佢哋聲線起到化學作用：「龍婷把聲可以帶出丁文俊最Man嘅位，丁文俊把聲又可以帶出龍婷好女人一面，兩個係Perfect Match，個表演係The Best Wedding Song。」
不過伍仲衡就另有意見：「丁文俊唱得唔夠溫柔同浪漫，所以我唔畀人情架！」嘉賓評判巫啟賢就嫌佢哋唔夠了解歌曲：「用錯方式去唱，頭先以為自己去咗中央電視台嘅晚會，柔情蜜意唔見咗！」
至於周吉佩同曹敏寶呢對組合造型一樣搶眼，佢哋以白色Tone襯絕上陣，非常合拍。 而吳大強同鮑聖光嘅組合亦係亮點之一，兩大靚聲王終極合體獻唱《Happy Together》，齋睇牌面相當有睇頭。佢哋仲齊齊自彈自唱，不過亦成為佢哋致命傷，齊齊被批聲音唔入咪。
肥媽話： 「你哋揸結他唱歌，個咪離得太遠，如果用Mic Stand你哋都係要埋去唱。」巫啟賢就坦言：「我覺得你哋揸結他反而綁住咗喺度，好保守，只係喺一個好安全嘅範圍將呢隻歌交代咗出嚟，反而呢隻歌嘅精神出唔到。」伍仲衡則話：「唔覺得 你哋係做緊同一個表演，同埋你哋把聲冇Magic。」喺上集獲得MVP、累積分數登上三甲嘅Bill哥哥，今次會唔會再陷入危機呢？
《中年好聲音》星期日晚 20:30 翡翠台
《祝福》羅啟豪+區俊傑
《Happy Together》吳大強＋鮑聖光
《我的心裡只有你沒有他 X 忘記他》支嚳儀＋劉智衛
《選擇》龍婷＋丁文俊
《憑着愛》林鉫徫＋ 陳早怡
《朋友別哭》李佳+鄧家豪
《千載不變》顏志恒+魏嘉信
《童話》周吉佩＋曹敏寶