今個星期進入結局篇嘅《隱形戰隊》劇情越嚟越緊張，11號晚劇講到劉佩玥飾演嘅Shadow同劉穎鏇飾演嘅邢風被阮浩棕飾演嘅鏗少同易宇航飾嘅暴龍、何慈茵飾嘅拳霸綁走，期間兩人受盡折磨，又水刑又被困車內遭泥頭車猛撞，雖然邢風最後被救出，但已經重傷昏迷，而仍然被擄走嘅Shadow，就再被鏗少強姦兼活埋。
不過呢集入面，Tiffany同何慈茵喺更衣室嘅打鬥戲就令唔少觀眾睇到相當肉緊，佢兩個Locker打到去長櫈，最後原本一直處於下風嘅何慈茵，將暗殺武器換成 Tactical Pen，成功將Tiffany 制服。由於整場節奏緊湊、拳來拳往，令大家都封何慈茵係最強打女。
何慈茵接受訪問時，就表示好開心而家觀眾見到「何慈茵」呢個名，就會期待有精彩嘅打戲出現，佢話：「對我嚟講係好大嘅鼓勵同推動力，希望可以幫到手帶起香港動作戲嘅熱潮。」講到同Tiffany喺更衣室嘅大戰，何慈茵就讚對方專業唔錫身，兩人真拳拳到肉：「我記得Tiffany前臂打到瘀晒，佢比我想像中更tough，因為佢戲服好多時都係背心，手臂同腰都好難攝 pad(保護)。 同埋佢吊威也好多時都勒到背、胳肋底同手臂損晒，但佢依然冇怨言去努力做好每個動作。」
能夠有咁精彩嘅打鬥戲，當然唔少得幕後嘅龍虎武師，何慈茵就特別感謝佢哋每一位嘅付出：「佢哋每個人都付出同犧牲好多，冇咗佢哋啲打戲唔會咁精彩。」而Tiffany亦喺 IG 上載咗佢同全劇唯一「替身」嘅合照，仲搞笑咁多謝「對方」幫佢完成最危險嘅動作。
至於做咗廿幾集兵嘅女女，啱啱先同Shadow有啲進展，點知Shadow就慘遭擄走兼被強姦，搞到女女數度崩潰。喺11號晚結尾時，POTT 終偵察到鏗少位置，眾人趕到現場後，收到嘅竟然係鏗少留低「等收屍」嘅字條，令女女急如熱鍋上螞蟻；而另一邊廂，被鏗少折磨到不似人形嘅Shadow， 被困喺木箱內活埋，至於Shadow會唔會成《隱形戰隊》結局篇嘅亡魂第一人？當然就觀眾繼續收睇落去啦！
《隱形戰隊》結局篇 星期一至五 20:30 翡翠台
