一連13集嘅TVB競技遊戲節目《真係唔好笑》逢周六晚9點45分翡翠台播映，每集均會邀請唔同嘉賓，與主持分成兩隊上演連串搞笑對決，各人要喺唔同搞笑攻擊下忍住笑聲，一旦笑出嚟就要接受大懲罰，今個禮拜六播出第3集，邀來鄭衍峰、孔德賢及陳星妤擔任嘉賓。
是集 《真係唔好笑》強攻觀眾集體回憶，一班藝人齊齊穿上古裝化身經典劇集角色， 造型十分搶眼，包括何廣沛化身《尋秦記》項少龍、彭慧中化身《金枝慾孽》董佳爾淳、郭子豪化身《神鵰俠侶》楊過等。當中化身《西遊記》孫悟空嘅奶仔黐到成身毛，又大晒超強口速一輪嘴讀出經典對白「我係如來佛祖玉皇大帝觀音菩薩指定取西經特派使者花果山水簾洞美猴王齊天大聖孫悟空」，完美還原經典；「顏值擔當」馮盈盈化身《神鵰俠侶》小龍女、「可愛擔當」羅毓儀則畫花塊面扮演《東西宮略》鍾無艷，效果卻似足動漫《鬼滅之刃》禰豆子。
今集另一亮點就係所有遊戲均喺電視廣播城嘅古裝街進行，其中一個遊戲「古語有云」，製作組喺古裝街鋪上長長石春路，男參賽者要孭住女參賽者行過石春路，鬥快敲鼓搶答將文言文翻譯成白話。出名大隻嘅郭子豪原來得個殼，孭住麥美恩行石春路，頻頻痛到嗌救命，又多次將麥美恩掉到地上；至於外國長大、中文水平麻麻嘅麥美恩，被「干卿底事」考起；另大家都被「朽木是也」考起，最終只有羅毓儀答中，想知道「朽木是也」究竟係咩意思？周六呢集便會揭曉。
壓軸遊戲就係「江湖追殺令」，遊戲玩法係每隊獲配備兩把水槍，喺古裝街內進行追殺遊戲，每3分鐘就會轉換追殺名單，被追殺嘅只要致命位置被射中就出局，呢個遊戲非常考驗參賽者體力，因要喺古裝街內不停跑來跑去。 節目中迷戀女神彭慧中嘅奶仔，上演英雄救美，奶仔甘願自我犧牲為彭慧中解圍，再度爆出溝女金句：「我覺得就算冒住死嘅風險，都要保護我嘅 Partner！」而奶仔慘遭淘汰後，彭慧中就如佢扮演嘅角色董佳爾淳一樣徹底黑化，佢大嗌：「我要做反骨仔，我唔會再相信人，啲人成日蝦我天真無邪！」結果鬥到最後只剩下佢同陳星妤互相廝殺，究竟彭慧中最終能否為奶仔報仇？密切留意周六晚播出嘅《真係唔好笑》。
《真係唔好笑》逢周六晚 9 點 45 分翡翠台播映