Kelly（陳慧琳）繼《風眼》後，推出全新作品《我的親人》延續故事，《風眼》以颱風喻愛情，站喺風眼位置先可以睇清全局，拋開掙扎與矛盾找回內心嘅平靜，而新歌《我的親人》延續故事，當平靜過後，既然唔能夠以戀人身份繼續，只好視對方為親人般相處，並祝福對方一切安好。
《我的親人》由林若寧填詞，並由韓國音樂人YOO JEONG HYEON編曲，並與KIM KI WON作曲，BEA YEOUN HEE監製，Kelly入錄音室時心情緊張，事關韓國團隊帶同聲樂教練一同錄音，Kelly指收到《我的親人》時見歌曲Key（定調）非常高，佢就問聲樂教練「係咪真係要唱呢個key㗎」，Kelly形容呢個係嗌破喉嚨嘅key！
疫情期間Kelly秘密練兵，練習足一年多，到進入錄音室時佢心想：「始終係面對韓國人，唱歌時唔可以太失禮，盡量去發揮。可能係我練習咗一年幾，唱完後佢哋拍手讚好，我心裡頓時放鬆咗！因為能夠唱得出佢哋要嘅效果。」錄音當日，監製BEA YEOUN HEE聽完Kelly第一次演繹後，大讚佢聲線heart warming（窩心動人）。而隨行聲樂教練本身亦係製作人，為Kelly製作過《花見小路》及《尾站天國》兩首歌。
Kelly坦言每次讀歌詞都眼濕濕，因為當一個曾經愛過嘅人如今要變成親人，感覺真係十級慘，唔能夠喺埋一齊又要祝福佢，Kelly提到每次唱『如知己如姊妹對你』呢句都打晒冷震。
《我的親人》MV延續《風眼》MV故事，喺《風眼》MV最後一幕身影其實就係今次男主角謝君豪，劇情講Kelly與謝君豪係舊情人，年輕時謝君豪留下一張寫上「Forget Me」嘅名信片後不辭而別，呢個鬱結埋藏喺Kelly心裡多年。到二人長大後再次聚頭，舊畫具、名信片等物件再次出現，可惜人面全非，二人如親人般以禮相待，彼此明白到關係無法回到當年，到底謝君豪當年離開Kelly有何苦衷？今晚9點MV正式上架，令人意想不到結局自有交代！
Kelly分享今次與謝君豪合作感到壓力，同時過足戲癮：「謝君豪係影帝嘛，所以今次都好緊張，雖然現場冇收音，但我哋係有對白、有走位，感覺上係拍戲一樣。而結尾我嘅笑容其實拍咗兩take，一take係懷著複雜心情嘅強顏歡笑；另一take係較直接啲，係一個釋懷嘅笑容，最後導演選咗後者，因為佢唔想故事太沉重。