劇情改編自網絡小說嘅輕鬆古裝喜劇《川內相親》將緊接收視口碑不俗嘅《隱形戰隊》星期一起首播，呢套新劇除咗主題曲《相親相愛》由 姚焯菲 同 張馳豪 合唱之外。仲由「懷柔王子」白敬亭、「初戀女神」田曦薇、陳小紜、劉冠麟、范帥琦同昌隆等為大家爆笑演出。
故事由共分九川嘅一個地方開始，當中尤以新川實力最強，佢哋嘅領主(高曙光 飾)為眾多少主聯姻選婚，有川主希望以婚姻作攏絡，亦有想嫁入豪門嘅士族。自小多病嘅新川六少主尹崢(白敬亭 飾)，雖然喺家族中一直缺乏存在感，不過其實胸懷大志。
出身寒微嘅李薇(田曦薇 飾)，因為為食而同白敬亭結下緣分，不過因為出身普通，只能被選為側夫人。佢哋兩個因食結緣，跌跌撞撞間唔止口味相投仲互生情愫。白敬亭又同五少主尹岐(昌隆 飾)感情最好，佢哋處理政務上得心應手，漸得川主信任，但係就惹來嫡長主尹嵩( 張曉晨 飾)嫉妒，借一次假幣事件陷害二人，最後昌隆為保全六弟而獨攬罪責被貶為庶民。事後白敬亭痛定思痛，喺田曦薇扶持下，逐步向新川主方向邁進。
《川內相親》以虛構時空避免正史劇集嘅嚴肅，角色亦性格鮮明。喺內地播出時仲被觀眾形容係「電子榨菜」，認為可以煲住劇送飯。故事喺輕鬆愛情中夾雜美食情節；劇情仲非常出人意表。
女主角田曦薇被內地觀眾形容「擁有一張初戀的面孔」，單係白敬亭同佢從錯摸到曖昧，已經令人非常肉緊。而白敬亭則素有「懷柔王子」之稱，修讀音樂加上略帶冷傲嘅表情，仲被認為有韓星感覺，俘虜唔少少女心。
今次「初戀女神」同「懷柔王子」合作，佢哋嘅情深對白仲成為唔少人口中金句。劇中其他角色亦令故事有畫龍點睛效果，好似歡喜冤家不打不相識嘅五少主尹岐( 昌隆 飾)同夫人丹川郡主上官婧(范帥琦 飾)、「娶」咗24位以為深愛自己嘅美少女，自以為俊俏到非常自戀嘅三少主尹岸( 劉冠麟 飾)。
此外，《川內相親》亦集合眾多靚女演員，除咗田曦薇外，亦包括范帥琦、陳小紜、陳紫 函、劉令姿、劉萌萌等，位位都顏值爆燈。
《川內相親》17號起 星期一至五晚 20:30 翡翠台