竇驍與何超蓮拍拖近4年，今日正式成婚，事前被指唔會到場嘅家姐何超雲同孖生細佬何猷啟都飛到當地見證神聖一刻，而好朋友李蘊亦擔任姊妹一職。一對新人為打造一個難忘婚禮，竇驍親自參與整個籌備過程，從場地選址、設計主題、內容構思到音樂選取等細節都相當保密，務求構思嘅每個畫面，都以最完美的方式呈現於現實當中。
婚禮儀式同晚宴場地搭建玻璃天幕，草地周圍種滿綠色大樹，以白色同粉紅色鮮花作點綴；營造出一個隱秘且高貴的夢幻莊園。場地中央水池上以一座橋連接，高雅嘅蓮花喺池中綻放。
華裔設計師Vera Wang為超蓮度身設計兩套夢幻婚紗，而有鞋中之王之稱嘅Roger Vivier，亦特別為新娘子設計訂造婚嫁鞋履。首飾方面分別由香港龍頭珠寶集團周大福同英國著名鑽石珠寶商Graff提供。
超蓮身穿一襲白色拖尾婚紗，挽著舅父的手慢慢步入場地，手上戴住竇驍以佢生日為靈感訂製嘅粉紅鑽石求婚戒指亮相。竇驍接過新娘後，兩人互相宣讀誓言同交換戒指，竇驍坦言希望將超蓮由自信獨立嘅女皇，轉變成一位被自己捧喺手心疼愛嘅公主。
超蓮亦向賓客發表對老公嘅愛的宣言，事前對婚禮細節毫不知情嘅佢，仲對竇驍嘅心思細節非常感動，認為一花一草都充滿住愛。
