TVB綜藝歌唱真人騷《中年好聲 音》最後六強誕生，分別係李佳、龍婷、吳大強、顏志恒、羅啟豪及周吉佩（排名不分先後），六強選手將於本周日（23號）晚上8點半直播《中年好聲音登峯之戰》爭奪總冠軍。《中年好聲音》六強選手，位位都係唱得之人，最終邊個大爆發奪冠仍係未知之數！
根據「TVB 綜藝」Youtube頻道數據所得（截至噚日早上9點），綜合六強選手過往演唱歌曲嘅觀看次數，「點擊王」頭三甲順序為吳大強、龍婷及顏志恒。Bill哥哥吳大強個人單曲及合唱歌曲總觀看次數突破415萬，當中《浪子心聲》勁吸48萬觀看次數，該集Bill哥哥首度Solo獻唱廣東歌及出動吹口琴秘密武器，表現搶眼；而《情憑誰來定錯對》與《Quando Quando Quando》嘅觀看次數同樣超過46萬，共有3首單曲突破45萬Views嘅大強，名副其實係「中年點擊王」。
顏志恒《一首歌一個故事》成單曲點擊之冠
「點擊王」第二位係小龍女龍婷，其個人單曲及合唱歌曲總觀看次數逾270萬。 擅長唱小調嘅小龍女近幾集接連有突破，包括唱廣東歌、玩Rock風及跳舞等， 去到決賽會唔會再獻新猷？大家拭目以待。至於「點擊王」第三位係顏志恒，其個人單曲及合唱歌曲總觀看次數逾260萬，當中《一首歌一個故事》勁吸61萬觀看次數，更係所有參賽者單曲之冠，實力不容忽視；值得留意嘅仲有Bill哥哥同顏志恒合唱《總有你鼓勵》獲得逾63萬觀看次數，成績斐然。至於由吳大強＋李佳＋龍婷＋馮志豪＋應德榮合唱《今宵多珍重》吸逾 66 萬觀看次數，係《中年好聲音》最多人觀看嘅演出片段。
「最強黑馬」羅啟豪成唯一兩奪 MVP 選手
實力唱將李佳及羅啟豪則越唱越強，潛力不容忽視。身為歌唱導師嘅李佳，比賽初期表現未算突出，去到中後期，李佳爆發小宇宙過關斬將，最終以累積排名分最高分姿態殺入六強，就連「奄尖魔人」伍仲衡大讚真係愈唱愈有味道。而有「最強黑馬」之稱嘅羅啟豪，同屬慢熱選手，清晰咬字唱腔是其招牌撒手鐧，曾獲不少好評，更係唯一兩奪MVP選手。周吉佩曾入行做歌手，佢係《中年好聲音》「顏值擔當」，喺節目不時對住太太深情獻唱，「愛妻號」形象相當入屋，加上現年36歲嘅佢係6強中最年輕選手，甚有機會於網上投票一環殺出血路。 
而於決賽前夕，TVB官方社交網平台「See Saw 先」再有新搞作，邀來同屬《好聲音》嘅曹敏寶及梁浩銓落區做街訪，親身測試六強選手中誰人獲撐指數最高， 最終周吉佩、顏志恒及龍婷暫時睇似較受街坊歡迎，睇落其他選手要再加把勁落力拉票。向來搞鬼嘅「See Saw 先」訪問街坊最想Foul四大固定評審中嘅邊一位，想知道最終結果？密切留意「See Saw 先」社交平台今晚播出嘅最新片段！
《中年好聲音登峯之戰》周日晚 8 時 30 分翡翠台直播