熱播劇集《法言人》，劇中有唔少詳細又全面嘅法律知識，據總監製劉家豪同監製陳志江表示， 編審團隊為咗準確咁呈現法律知識同審訊程序，事前曾去唔同法庭旁聽，想盡辦法請教律師、師爺，甚至法官。
佢哋又讚喺劇中飾演麥大狀嘅 William朱滙林超幫手，唔只為編劇團隊提供大量法律書籍，仲幫劇組約到去清洪大律師嘅律師樓實地考察，陳志江仲話William為咗解答編審團隊嘅問題，睇咗好多同法律有關嘅書同新聞：「因為佢話驚自己未必 Update，所以要做好多功課，又幫手打咗好多電話去尋求專業意見。」而家豪哥則表示自己身邊嘅律師朋友都讚《法》劇還原度極高，解釋法律嘅嘢又好準確：「有觀眾話睇完會有嘢落袋，娛樂角度 ok，節奏又明快，我哋成個團隊收到呢啲訊息都好鼓舞。」
以高考 2A2B 上佳成績考入香港大學法律學院嘅William，當年修讀法律學院時曾到清洪律師樓當暑期實習。為咗幫助《法言人》編審團隊，佢竭盡所能提供協助，並為劇組碌盡人情咭，問到點解會同清洪到而家仲Keep到咁好嘅關係？ William就笑言自己如果當年有繼續考牌嘅話，就會跟咗對方做大律師，所以自己到而家都係叫對方做師傅。William續說：「清洪好好人，喺 Site Visit 時同啲編審傾咗好多偈。雖然嗰時暑期工只係兩、三個月，因為每日都要對住，仲要唔係淨係 Office Hour，要學埋 Social，因為學識放鬆對律師好重要。」
雖然自小成績優異，但William細個嘅第一志願唔係做大律師，而係加入無綫拍劇，佢仲話讀 Law前自己一直都想考藝訓班，但因為嗰幾年冇公開召募嘅關係，所以就繼續讀書考到入法律系，William話當時自己都疊埋心水諗住做律師，但點知睇完《衝上雲霄》後就令佢想去考飛機師。William話：「我第 一次考試係衰咗，但因為一年內唔可以再考，咁就我做住空少先之後再考，點知都係唔得。」雖然做唔成飛機師，但William就透過 Tvbeople 比賽投身無綫，做咗3年嘅主持工作，終於等到拍劇嘅機會，William話：「我想入TVB 做演員，純粹係因為鍾意 TVB 嘅劇，純粹係由細睇到大仲要停唔到。記得當年高考，我要睇完《十月初五的月光》同《男親 女愛》先可以瞓，呢個係我唯一減壓方法。」
拍劇嘅追夢生涯展開咗超過13年，William終於遇到麥大狀呢個別具意義嘅角色，佢興奮表示自己好鍾意麥大狀呢個角色嘅原因，係因為《壹號皇庭》系列係佢熱愛劇集之一，佢話：「咁多集我都睇晒！好想多謝監製同編審，我兒時夢想都有諗過做大律師，我終於做到，所以着起大律師造型時好感觸。現實做唔到嘅，都起碼劇入面做到，叫完咗個心願。」
講到以前曾經定落「慳錢十誡」，William話都已經成為歷史，佢指當年慳錢係為咗開餐廳，想有穩定收入嚟支撐自己繼續留喺 TVB 拍劇，但後來佢發現開餐廳反而會阻礙到自己：「因為要投放好多時間，又要睇舖、又要煮嘢、又 要洗碗，雖然嗰三年學咗好多嘢，但都決定專注番拍劇先。」
《法言人》逢星期一至五 21:30 翡翠台
