連詩雅（Shiga）於4月24號與陳家樂拉埋天窗，正式成為陳太，不少網民好奇一向跟連詩雅情如兄妹嘅周柏豪，點解冇出席連詩雅婚禮，連詩雅今日凌晨於社交平台上載一條影片，片中見周柏豪送驚喜搞喊連詩雅。
連詩雅與周柏豪相識多年，二人同一間公司出道，之後又再簽約同一間唱片公司，彼此關係似足兄妹，多年來見證大家成長，連詩雅更嗌周柏豪係阿哥，周柏豪又點會冇出現，原來佢早喺當日先於酒店樓下等咗半個鐘，直到等連詩雅整好儀容，周柏豪凌晨4點驚喜現身，雖然連詩雅婚禮撞正內地巡唱，周柏豪仍匆匆返港親自送祝福。
片中見周柏豪凌晨4點喺連詩雅準備出嫁嘅酒店房外，由工作人員叫佢入房內，當時連詩雅身穿紅色睡衣、白色浴袍，一見到周柏豪到來，即彈起身掩嘴爆喊，問佢點解喺度，開心攬住佢，場面非常感動，之後周柏豪趕返內地開騷。
連詩雅稱完全冇諗過周柏豪喺出發工作前，特登出現送上祝賀，當刻令連詩雅喊到崩潰，佢又指周柏豪係佢入Starz嘅第一個朋友，二人一齊長大，一齊見證大家喺工作及人生路上唔同嘅成長，連詩雅感謝周柏豪排除萬難都要來見面，「一切在心中，之後再好好慶祝」，佢亦好多謝辛苦安排呢件事嘅朋友仔，連詩雅更打tag「出嫁前的那一刻」、「感謝你們一直都在」，之不過連詩雅一開始唔小心將「出嫁」寫成「出家」，周柏豪忍唔住提佢：「出嫁呀！出家係另一樣嘢呀！」接著連詩雅亦有修正。