福幼基金會日前舉行慈善高爾夫球賽同慈善晚宴，我哋娛樂新聞台嘅主播同事 梁家琪 亦都同媽咪一齊出席，家琪仲落力攞住籌款箱「滿場飛」，原來梁媽媽係今次活動冠名贊助商嘅老闆，所以家琪到場幫手兼做義工，又落力推銷慈善獎券，更得前輩 張穎康 蘇志威 大力支持。嘉琪仲代表送出名表贊助嘅腕表老闆 沈慧林 上台抽獎，由同老公陳展鵬拍拖出席嘅 單文柔 幸運抽中大獎，獲贈價值逾4萬元嘅舵飛輪名表。
家琪話：「今次活動係為福幼6月開展嘅兒童復康中心籌募啟動經費，雖然我冇參加高爾夫球賽，不過做義工賣獎券亦好開心，而善款係用嚟幫助小朋友睇醫生，好有意義。」家琪過去曾參與為長者派飯嘅活動，又更希望有機會探訪基層家庭小朋友，望透過接觸唔同嘅人，由生活體驗中學習。
家琪2021年開始報讀一個商學院關於創業嘅課程，先後去過北京、上海上課：「其實自細開始我就想創業，因為媽咪係女強人，我很想似媽媽一樣可以獨當一面，創立自己嘅事業。媽媽想我接管家族生意，因為我係獨女，不過我想趁年青時候追夢，做演員係我夢想，家人亦好支持，或者到婚後有自已家庭先考慮。媽媽都會覺得我在外碰碰撞撞辛苦，不如留喺屋企舒舒服服仲好，不過我好想嘗試創業。」
梁媽媽又透露希望乖女早日拍拖，仲曾經介紹一位飛機師俾佢認識，不過因為大家太忙未有發展。身處娛樂圈嘅家琪話：「我唔鍾意圈中人，我憧憬將來婚後可以安定，同老公煮下飯，好好享受家庭樂，娛樂圈工作太忙，好難同另一半時刻相處，所以不會考慮。」