由三位本土新導演 許學文 陳翊恆 黃千殷 分別執導三個犯罪故事《頭髮》、《貓劫》和《闇室》綜合而成嘅犯罪懸疑新片《失衡凶間之罪與殺》將喺5月25號正式上映，其中單元《貓劫》，集合蔡思韵 朱鑑然 胡子彤 同 ANSONBEAN 四位充滿活力新生代演員參演。
ANSONBEAN 參加比賽入行後跳唱形象俾觀眾留下深刻印象，今次首度參與電影《失衡凶間之罪與殺》單元故事《貓劫》，仲有唔少打鬥場面，令呢位影壇初哥心情相當振奮，ANSONBEAN話：「期待咗好耐，一直希望有機會拍動作戲，而家算係了咗一半心願，因為今次主要係我打人，想將來可以拍戲俾人打，有來有往嘛！」
戲中ANSONBEAN同朱鑑然同樣情傾蔡思韵，一直喺Ceci身旁默默支持，對於「情敵」朱鑑然嘅一舉一動更特別敏感，佢哋喺戲中仲會為Ceci大打出手。ANSONBEAN首次拍戲就有打鬥場面，佢在場耐心地聽從武術指導，休息時間又不斷練習，另一邊廂嘅朱仔，就有工作人員喺佢身上捆上軟墊防止受傷。
ANSONBEAN又話：「拍動作戲比我預期複雜得多，例如要就角度，令畫面更逼真，原來一啲都唔容易，不過學到好多嘢，朱仔好大膽，唔擔心俾我錯手打中，加上佢眼神好有戲，令我打嘅時候更加嬲。」
對於一償心願拍打戲， ANSONBEAN仲坦言諗起發哥周潤發：「因為頭先場戲，講我跑入去打朱仔，令我諗起電影《監獄風雲》，發哥衝埋去咬張耀揚耳仔嗰一幕經典場面，不過，我冇佢咁癲，哈哈！」