52歲洪欣日前於微博宣布與年輕10年嘅內地演員張丹峰分訊，結束14年婚姻，事後二人未有正面回應此事，而盛傳導致二人婚姻破裂嘅第三者畢瀅，一度撇清關係，更代洪欣同張丹峰澄清「沒離婚」，事隔3日，張丹峰捲入婚變傳聞，首度更新社交平台，噚日上載一條影片，見佢與朋友一齊燒羊肉。
張丹峰喺社交平台先上載一條短片稱烤全羊就要外酥裏嫩，更貼出「舉V」Emoji，可見其心情輕鬆愉快，身穿黑色休閒服、著上拖鞋嘅張丹峰，與男友人喺花園碳燒全羊，其間見佢一邊燒肉一邊戙起隻腳，滿面笑容更豎起手指公，跟友人飲酒暢談，睇落唔似受離婚吵架傳聞影響， 更向鏡頭舉杯。
有網民質疑佢哋係唔係用「離婚」炒作新聞，另有人則認為老婆洪欣講完「不再是夫妻關係」，張丹峰開大餐似足「慶祝離婚」咁，惹來大批網民狠批張丹峰，紛紛留言「還是第一次見有人離婚之後這麼開心的」、「如果是真的，這表情這動態，有點太囂張」、「洪欣太慘了」、「沒有洪欣，那來有你的今天」。
