熱播法政劇《法言人》嘅結局篇劇情峰迴路轉， 除咗金師爺( 馬國明 飾)、田佑家( 林夏薇 飾)，大雄( 張頴康 飾)、釘官( 蔣祖曼 飾)， 阿Will( 黃嘉樂 飾)、Coco( 趙璧渝 飾)嘅三大感情線會有突破性發展，「壞蛋鐵三角」Adam( 張達倫 飾)、熙少( 海俊傑 飾)同TK( 陳少邦 飾)亦會終極反目。
熙少喺星期一晚一集被揭發虛報學歷，身敗名裂之餘仲失去靠山，TK亦馬上反面唔認人；為咗報復，熙少偷走TK重要物品，仲將其轉至佑家手上，事件將引發軒然大波。
呢晚劇情絕對可以「甜到糖尿」嚟形容，金師爺眼見佑家成日生理痛，暗地四出尋覓舒緩痛楚嘅「發熱熊啤啤」，原本打算趁對方不為意送禮兼示愛，點知就被佑家識穿仲反客為主問金師爺：「隻熊公仔送畀我架？你鍾意我呀？」
計劃被打亂嘅金師爺無計可施，只答到：「個劇本唔同晒喇，你鍾意點就點啦！」之後佢哋街上甜蜜 「熊抱」兼深情一吻相當溫馨，馬明同薇薇終於成事仲獲觀眾大讚甜度爆錶。搞笑嘅係「金田CP」嘅定情熊啤啤，竟然喺網上引發討論，眼利觀眾仲閃電憑薇薇詢問售貨員嘅短短半秒鏡頭，發現熊啤啤售價只需$650，仲大讚實用又抵買。
呢晚另一焦點亦落喺Alice( 何依婷 飾)身上，先喺蹓冰場大晒長腿嘅佢，之後再喺男友Hogan( 丁子朗 飾)冋好友Tony仔( 容天佑 飾)陪同下往電影公司試鏡，又按高層Ada( 楊梓菁 飾)要求換上啦啦隊制服，大擺嘟嘴同送心心嘅可愛Post。
呢場戲當中其餘四位試鏡靚女，全部都屬2021年港姐出身，當中包括下星期接棒嘅 《一舞傾城》中飾演重要角色嘅陳星妤、備受綜藝節目歡迎嘅邵初，同屆亞軍人馬梁凱晴、仲有最上鏡小姐得主楊培琳。
換上啦啦隊服嘅佢哋大晒青春無敵一面，畫面養眼。不過其實所謂試鏡只係桃色陷阱，係TK 為討好富家小Martin( 唐嘉麟 飾)設下騙局。而今晚一集Alice除咗被軟禁，仲會上演驚險十足嘅「密室逃脫」，將掀起連場打鬥。而TK魔爪今晚仲會伸延到另一重點小花 陳嘉慧 Erica身 上，由預告片可見，神智不清嘅Erica喺鏡頭前失去意識被寬衣解帶，情況相當危急，據知 Erica嘅角色仲係影響住《法言人》結局篇劇情發展嘅關鍵人物，記得緊貼住劇情發展喇。
《法言人》結局篇 星期一至五晚 21:30 翡翠台