TVB熱播劇《一舞傾城》噚晚（17號）播出第三集，劇情講到Monica（蔡潔飾）為救捲入洗黑錢案嘅男友Dave（何浩文飾），「金魚」Monica為求司徒大狀（李道瑜飾）幫Dave打官司，不惜主動獻身。司徒大狀惟完事後，告訴Monica崩潰真相，指經過調查後發現Dave確實有份洗黑錢，但佢有把握為Dave脫罪，Monica大感震驚及傷心，皆因佢一直以為Dave係無辜入獄。
蔡潔喺呢場戲將角色嘅不情願及委屈演繹到位，令觀眾都戥佢傷心。蔡潔受訪時笑言呢場戲唔難演，蔡潔坦言事前做足保護措施，大讚前輩李道瑜好Gentleman。講到不少觀眾替佢感到委屈，蔡潔表示：「大家可能覺得我外表柔弱啲，每次有呢啲戲份會覺得我好慘，為呢件事添加咗啲色彩，但其實戲外我係一個男仔頭，同前輩都有講有笑，呢場戲對我嚟講唔係太緊張，大家睇完戥呢個女人好委屈，有好想保護呢個女仔嘅心，我覺得好 Sweet！」
姚子羚飾演「超班警花臥底」Michelle噚晚登場，子羚一出場即一個打四個， 大晒真功夫。其實子羚之前喺《鐵拳英雄》已經打到飛起，打戲對佢嚟講算係得心應手，子羚受訪時表示：「之前打戲嘅經驗對我好有幫助，喺做某啲動作時會比較易上手，上次《鐵拳》就比較多功夫同用武器，今次《一舞傾城》就用現代啲嘅打法，同埋會有揸槍嘅戲份。」問到會否朝打女目標進發，子羚坦言：「其實 拍打戲都幾辛苦，同埋預備功夫要做到足，日後有機會都想挑戰唔同嘅動作場 面。」 
今晚呢集將有一場子羚狠踢李嘉下體的場口，子羚本身同李嘉係Friend，知道對方係練武之人，佢爆李嘉識得一種功夫可以將「下面嘅嘢收埋」，李嘉仲叫子羚放心去踢，子羚喺拍攝前先試位：「拍之前都試過一次，踢落去時真係冇嘢嘅，到正式拍時我真係好認真、放盡去踢，係一次幾得意嘅經驗。」想知道子羚踢得幾咁盡情？李嘉「奇異神功」有幾厲害？密切留意今晚一集《一舞傾城》。
《一舞傾城》逢周一至五晚 9 點半翡翠台播映