蕭正楠廣州開入行紀念騷 老婆翠如台上支持代收花

入行20周年嘅 蕭正楠 呢日喺廣州舉行紀念演唱會，仲有歌迷特別由外地飛到現場支持，而Edwin亦大唱多首當年嘅金曲，又翻唱唔少經典廣東歌。佢仲話連自己都冇諗過會有機會舉行呢次音樂會，仲搵埋老友 曹永廉 幫佢擔任嘉賓，不過阿廉一出場就變咗同佢鬥嘴，搞到笑聲四起呀。

而Edwin嘅太太 黃翠如 同 麥長青 呢日都有現身現場支持，近年專注拍電視劇嘅Edwin，呢日亦都同歌迷分享咗多首劇集歌曲。事後佢接受訪問時，就話好多電視劇歌曲自己都非常鍾意，而好快佢就會投入新劇拍攝，仲會同 鄭則仕 合作呀。