「第三屆兒童及青少年粵劇折子戲公開大賽」經過半年遴選,，日前假「無綫廣播有限公司」電視城舉行決賽，文體旅局楊潤雄局長親臨主禮，一眾大老倌包括尹飛燕、龍貫天、宋洪波、陳詠梅及粵劇音樂大師朱慶祥等擔任評判，佢哋異口同聲讚賞今屆不論兒童及少年組參賽者均充滿潛質，大會主席楊偉誠博士表示欣喜能做到傳承粵劇第一步，為粵劇界培育新星。
當晚兒童組冠軍為演出《怒劈華山》嘅宗樂瑤，今年只有11歲，評判之一嘅龍貫天指對方年紀少，但喺台上好有自信，唱腔有水準，老師悉心教出好徒弟，前途無可限量。至於少年組冠軍羅雅禧演出《红響喜之仙姬送子》，獲得粵曲音樂大師朱慶祥激讚對方聲色藝都具備，如果繼續努力，假以時日必係粵劇花旦好材料。
當晚擔任大會司儀嘅八和主席汪明荃，非常留心欣賞參加者演出，大讚青少年組冠軍羅雅禧，尤其對方用14米長綢作出不同水袖變化動作，相信下咗唔少苦功而得嘅成果。兩位冠軍獲得大會送出一萬元現金獎作為獎勵 。
文化體育及旅遊局楊潤雄局長、大會主席楊偉誠博士及粵劇發展基金主席呂汝漢教授等，當晚大會更招待百幾位樂善堂中小學嘅學生前來觀賞，向佢哋推廣粵劇，更要宣揚「尊師重道，忠孝禮義」嘅正確價值觀。
大會主席楊偉誠接受訪問時表示：「除咗係兒童粵劇折子戲決賽之外，主要係推廣粵劇嘅教育活動，『台上一分鐘，台下十年功』，進入決賽嘅表演者，是經過經年累月嘅磨練，才能達至今天成績，絕非不勞而獲。」楊偉誠透露本年度「兒童及青少年粵劇折子戲大賽」已經係第三屆，欣喜見到今屆兒童組報名隊伍為歷界最多，更開心上兩屆曾經參與過兒童組比賽嘅同學，有兩隊可以入圍青少年組，更打入決賽。
楊偉誠喜見開始做到傳承粵劇嘅第一步，為粵劇界培育新星接班人，讓更多年輕人對粵劇產生興趣，建立正確價值觀，相信日後一定能夠目到佢哋成長，香港粵劇未來一定會更加精彩。