方皓玟一連兩場演唱會呢晚圓滿落幕，現場歌迷到完騷都唔捨得走，不斷大叫Encore，方皓玟不敵歌迷熱情，再度上台大合唱《你是你本身的傳奇》及《It's Not Your Fault》，更向合作無間嘅填詞人黃偉文致謝。

方皓玟受訪時稱每次造歌係由心而發，佢希望之後繼續寫多啲好歌，方皓玟呢晚獲兒子到場支持，母子溫馨抱抱同kiss。方皓玟爆兒子表演慾強，不過兒子暫時未可以唱晒成首歌，佢都希望第時母子檔同台演出。

方皓玟指兒子好遲先講嘢，一度擔心兒子語言發展遲緩，試過帶兒子去見語言治療，方皓玟笑指點知而家講嘢比媽咪更叻！此外，方皓玟覺得香港人有國際視野，廣東歌遠至非洲都有人聽，方皓玟有時睇社交平台讀者播放率，見非洲朋友都聽廣東歌，希望多啲香港人可以衝出國際，做到更多好成績。

近日有一間名為「CGL COMPANY」喺社交媒體落咗海量廣告，指容祖兒《ANOTHER SIDE …… JOEY · MY SECRET · LIVE》演唱會招聘工作人員，職務為控制人流，處理出入登記、搬抬工作，薪金高達$960元一日，仲有食飯及交通津貼，似乎待遇優厚，不過主辨方今日澄清並冇授權任何公司聘請員工。

疑似詐騙網亦肆無忌憚喺網上與「應徵者」聲稱自己係代表英皇娛樂及演藝學院招聘幫工，當「應徵者」表示想做，對方即馬上改口指演唱會未開始，但可以先做其他同類型線上工作，為藝人團隊及VIP代訂酒店等， 然後要求「應徵者」留係聯絡資料，個人資料及電話等，再搵專人聯絡傾談工作內容。

演唱會總監馮貽柏表示該廣告含有詐騙成份，英皇娛樂及演藝學院並冇對外公開聘請容祖兒演唱會員工或兼職幫工，亦從未受權任何公司代表佢哋聘請員工，請大家留意唔好受騙！