龍婷慈善騷即將舉行嘉賓彭家麗現身綵排合唱

娛樂新聞

2023-05-24 13:30

龍婷近日正為即將舉行嘅慈善音樂會綵排，呢日嘉賓彭家麗亦都現身，同佢一齊Jam歌合唱。曾經喺《中年好聲音》合作嘅佢哋，被指聲線相似，而綵排之後就連佢哋都話自己都分唔清呀。

至於有冇機會再以唔同形式合作，Angela就話已經有海外朋友提出接洽，真係似乎隨時有機會咁喎。早前喺《好聲音》演唱會又唱又跳嘅龍婷，呢日仲笑言自己經過上次已經轉型成為跳唱歌手，話怕大家失望唔跳都唔得喎。

雖然好快就開騷，但係Angela早前先確診Covid康復，不過佢就話好彩聲線完全冇問題，所以完全唔會影響演出呀。

龍婷音樂會上化身跳唱歌手彭家麗擔任嘉賓合唱金曲

娛樂新聞

2023-05-30 11:30

龍婷聯同香港青年愛樂樂團舉行慈善音樂會，呢次係佢參加《中年樂聲音夢想成真》演唱會後首個個人騷，所以龍婷都非常重視，一開場就獻唱多首金曲。

為咗呢次音樂會，龍婷花咗三日時間去設計歌單，佢話自己有好多歌都想揀，但因為怕自己係台上唱時，觀眾唔鍾意會有冷場，所以呢次佢就揀晒觀眾喜樂嘅歌曲喇。

而為咗令觀眾睇到更多面向嘅自己，呢晚龍婷仲一展舞技做跳唱歌手，又同嘉賓彭家麗合唱金曲，龍婷話好多謝對方答應做自己音樂會嘉賓，同佢一齊重溫舊夢呀。