超級毛特兒大賽｜Yumi帶愛犬加入任應援團長 預備生分別現身有笑有淚

J2節目《超級毛特兒大賽》嘅16組人狗「預備生」已經分別亮相，爭奪接近50萬港元豐富獎金獎品。而23號晚播出一集，主持 周奕瑋 宣布仲有第17組「神秘預備生」，令全場大為嘩然。原來呢位「隱藏預備生」係「聲夢小花」 鍾柔美 ，帶同6歲多嘅貴婦犬Cha Cha擔任「超毛應援團團長」，為各位預備生打氣。原來Yumi家中有七隻狗狗，當中以Cha Cha最多才多藝，無論係「Sit」、「畀手」或「Hi Five」都應對有餘， 非常聰明。

能夠晉身「超毛」16強，自然有優勝突出之處。當中金毛尋回犬Silly就能「狗」所不能，竟然可以模仿救護車聲音，贏得唔少掌聲。而Silly主人Sharon亦因高顏值贏盡關注，模特兒出身曾拍攝電視廣告嘅Sharon，甜美笑容同一雙修長美腿令網民眼前一亮，「Sharon+Silly」仲獲封「美女與靚狗」Perfect Match。

另外入屋「靚狗主」，就係平時有客串做模特兒嘅摩天使Bubu主人Sasa，Sasa一出場就令現場眾人眼前一亮，主持之一 黃嘉雯 仲讚佢同愛犬都好似小公主咁可愛，而Sasa就搞笑地堅稱只有愛犬係公主，盡顯傻萌一面。

 「預備生」初登場環節中不乏感人故事，壓軸出場嘅芝娃娃Jammy，今年已經16歲；雖然年紀大，但Jammy依然相當好火，「反差萌」驚艷全場。而主人阿偉雖然樣子似足「詼諧版張學友」，但原來為人相當感性，陪伴Jammy十多年嘅佢，仲分享參賽背後洋蔥︰「諗住佢16歲喇，未必再有機會。其實贏輸冇乜所謂，佢咁可愛、咁得意、又細細隻。」有感若觀眾能睇到16嘅Jammy依然可愛時，已經別具意義。

Jammy嘅分享簡單但充滿愛，令主持 向海嵐 瞬間爆喊， Anne邊落淚邊感性話︰「我自己都好想同自己嘅狗狗留多啲回憶，趁佢仲健康，希望可以多啲時間陪住佢。」阿偉續指唔知道 Jammy可以生活到幾多歲，不過都會繼續「加油」，其他在場狗主都紛紛起立鼓掌致敬。

Anne事後接受訪問時依然未能平伏心情，強調狗狗係最好嘅伴侶同家人，亦再度強調陪伴嘅重要性︰「其實狗生真係唔長，好希望多啲時間一齊。 講到生離死別嘢，真係忍唔住。」

至於今晚播出嘅一集，16組「預備生」將進行第一輪淘汰戰，自選飾物拍攝官方照。評判將根據5C準則，包括Charm(魅力)、Character(個性)、Confidence(自信)、Concentration (專注力)同Courage(勇氣)，從中挑選12強晉級。

拍攝過程中，有狗狗不幸遇意外血染錄影廠，Carmaney仲因為某參賽者嘅表現感動落淚。首輪淘汰戰記得緊貼留意《超級毛特兒大賽》。

《超級毛特兒大賽》星期一至五晚 22:30 J2