今年係 溫拿 成軍50周年，早前TVB喺「Happy Summer」記者會上已經透露過，將會有溫拿五虎嘅50周年特輯《溫拿50好時光》，呢日 TVB娛樂新聞台 就嚟到拍攝現場探班喇！

由於8月將會九度踏上紅館開演唱會，而呢個演唱會更會係溫拿嘅告別演唱會，所以今次特輯就專登揀咗紅館旁邊取景。陳友表示過往嘅40年，溫拿每5年就會舉行一次演唱會：「但開完呢次之後就唔知喇。」鍾鎮濤隨即補充話呢次將會係溫拿嘅farewell party，仲話因為大家已經25歲咗好多年，所以都差唔多喇。而彭健新就話雖然有呢個決定，但佢哋都好唔捨得。而校長譚詠麟就指環顧世界，好少樂隊可以相隔50年都仲齊人，而且個個都身體健康，所以佢哋5個都話趁住大家都仲行得走得唱得玩得時，開咗呢個演唱會先，等樂迷可以有個美好回憶呀。

講到演唱溫拿就指已經有好多idea，B哥哥呼籲入場睇騷嘅歌迷，可以着返啲有時代感嘅衫嚟睇騷，大家一齊高興下呀！而講到呢次50周年特輯，校長就爆早前去主題樂園拍攝時，先發現葉智強係畏高呀！

校長譚詠麟、鍾鎮濤、彭健新、葉智強及陳友組成嘅温拿樂隊，今年成立50周年，早前宣佈將於8月喺紅館舉行演唱會，同一班陪伴佢哋長大嘅歌迷正式告別前，開騷前温拿先為TVB拍攝音樂特輯分享50年友情歲月。

 「校長」契仔關楚耀亦現身一齊合唱《朋友》，温拿歷年來金曲陪伴不少港人成長，唱盡香港幾代人心聲，彭健新相信演唱會歌單必定勾起大家回憶，佢哋會盡力做好告別演唱會，譚詠麟回想首次踏足紅館感觸良多，希望以好玩Party形式與歌迷創造美好回憶。