陳豪朱凱婷首獲TVB傑出員工獎好興奮 陳茵媺聽朋友講先知老公有份

陳豪朱凱婷首獲TVB傑出員工獎好興奮 陳茵媺聽朋友講先知老公有份

TVB定期舉辦傑出員工選舉,今日揭曉2023年上半年度傑出員工,三位得獎者有兩位係藝員同事,就係陳豪同朱凱婷,陳豪效力公司23年,首次獲得TVB傑出員工獎,佢接受TVB娛樂新聞台訪問同大家分享喜悅!

陳豪多謝咁多同事投票佢一票,好開心可以獲獎,陳豪續道:「話晒我係公司員工成廿幾年,金牌都拎咗兩個,而且一直係公司前線人員,冇諗過有份拎呢個獎,我以為幕前係冇份,以往係畀幕後一個獎勵,原來幕前可以分到一杯羹係開心嘅,亦希望拎到呢個獎嘅人可以將自己嗰份正能量、好嘅態度宣揚開去,令公司營造有更加好嘅營商環境。」

擁有美滿家庭嘅陳豪,對老婆陳茵媺(Aimee)及三個仔女愛護有加,未同佢哋報喜已計劃點去慶祝,陳豪又指:「仔女未知呀!我諗佢哋都好開心好興奮,不過Heidi(朱凱婷)係我老婆Aimee啲好朋友,變咗佢有同我老婆講,我都冇同老婆講,反而係Heidi講,我老婆先知!」而朱凱婷感謝提名人,佢開心可以同陳豪一齊拎獎,呢個係雙重喜悅!

星光路上|相隔16年再奪視帝平靜滿信心 陳豪自覺虧欠太太支持對方追夢

陳豪喺《萬千星輝頒獎典禮2023》憑台慶劇《破毒強人》再奪視帝寶座,阿Mo接受《星光路上》 潘盈慧 訪問,大談得獎感受同演藝路上嘅點滴。

阿Mo繼07年憑《溏心風暴》嘅「得得地」一角成為雙料視帝後,相隔16年再奪最佳男主角,佢坦言心情更平靜同有信心,而能夠喺太太陳茵媺(Aimee)手上接過獎項,更覺意義非凡:「係好special,難得由我太太頒畀我,其實最想我攞獎嗰個反而係佢。我嘅壓力係……我都想畀一個喜悅佢,但唔敢肯定畀唔畀到佢!最後宣布結果嗰吓我係開心嘅,再開心係能夠喺太太手上攞呢個獎。」

佢仲表示16年前攞獎,覺得個獎大過自己,而今次獲獎,自己嘅目光已經唔係只在獎項,最重要係印證自己所走嘅演藝之路係正確。
     
入行30年嘅阿Mo演藝之路曾歷高低,由模特兒走入電影圈,起初只係抱住搵錢心態「雙線」發展,後來覺得做模特兒既空虛又唔實在,所以先決定向演戲進發,可惜喺電影事業上發展未如理想。

雖然阿Mo有感心灰意冷,但佢都未有放棄,一直默默裝備自己,等待機會來臨,直到加入TVB,阿Mo有機會參演《妙手仁心II》,更自爆劇中經常「插袋」扮有型嘅原因,又話拍首部古裝劇《洛神》幾乎每一句對白都NG 50次以上,唔了解四字成語嘅佢,更將「瞻前顧後」講成「擔前顧後」,幸獲拍檔鄭子誠提點。

最後阿Mo隔空向Aimee發表愛的宣言,感謝對方願意喺事業黃金期時選擇結婚、為他生兒育女,並自覺虧欠太太:「我好支持佢出嚟拍戲,尤其小朋友開始大,想佢追求番自己夢想。」

 相關推薦

熱門搜尋