與陳樂榣由生意夥伴變情侶葉泓聲宣佈榮升做爸爸

前男子組合天堂鳥成員Gordon葉泓聲，今日喺社交平台出post宣佈做爸爸，而佢嘅另一半就係佢咖啡台嘅拍檔、前女子組合Freeze成員Ally陳樂榣！
Gordon葉泓聲宣布榮升爸爸 Gordon同Ally由生意拍檔變情侶。
Gordon喺社交平台post出3張同Ally嘅合照，其中一張係佢錫Ally個肚，Gordon留言話：「我會好好照顧你，囡囡以及我們的結晶品 I LOVE YOU！」而Ally亦同樣喺社交平台post出呢3張相，留言話：「多謝你走進我的世界！眼裏有你、心裏有你、現在肚裏也有你的！」相當Sweet呀！
Gordon喺社交平台宣布喜訊。 Ally亦同時喺社交平台公佈喜訊。
Gordon同Ally由朋友楊梓菁撮合，所以佢兩個公佈消息後，楊梓菁亦都有轉及post介話好開心，而Gordon同Ally就不約而同話會封返封大大嘅媒人行是畀對方。
楊梓菁係撮合佢兩個嘅媒人。
據知Ally目前已經有咗5個半月， Gordon話最初知道要做人爸爸時嘅心情係相當興奮：「最初知道Ally有BB真係好興奮，這是我一直的渴望，我真係好鍾意小朋友，係一個家庭觀念好重嘅人，好開心個天畀咗個咁好嘅禮物我！」Gordon話Ally係個工作狂，成日唔聽勸要休息多啲，佢話好彩對方懷孕以嚟身體都冇太多唔舒服。由於唔想Ally太辛苦，所以佢好sweet可話叫對方將粗重工作交畀自己。

同前夫育有一女嘅Ally，話Gordon對囡囡愛護有加，就因為呢點而被對方打動到，仲話喺拍拖時已經有組織家庭嘅計劃。講到婚禮嘅安排？Ally就透露會喺BB出世後先補辦。