古天樂連任電影總會會長 「總會拍電影」第二季公開招募劇本

去年香港電影大收旺場，幾部作品票房都有傑出成績，亦吸引咗大批觀眾重新入場。剛連任電影總會會長嘅 古天樂 ，就同總會決定推出第二季「總會拍電影」計劃， 將由6月1號起到8月15號期間接受報名，招募兼具本地特色同創意嘅電影劇本。

4個獲選電影項目中，獲選團隊將分別獲投資最高港幣420萬元製作費，將劇本製作成商業電影。古天樂話：「觀眾陸續回歸戲院，港產片再次獲得大家的關注同支持。 而行內，更多年青編劇、導演、新演員，以致不同工作崗位嘅電影工作者仍努力不懈咁尋找實現電影夢嘅機會。所以第二季『總會拍電影』希望挑選到4個電影項目。 期望能鼓勵更多有本地特色、有創意同唔同片種嘅劇本參加，令香港電影行業繼續Power Up，繼續自強不息！」

「總會拍電影」計劃對參加者嘅資歷同經驗不限，旨在鼓勵創作，獲選製作團隊需聘用本地電影工作者擔任所有工作崗位，藉此為同業創造工作機會、培育新一代電影人才，推動行業持續發展。

首季「總會拍電影」計劃中，兩部獲選作品—《惡人當道》同《不赦之罪》於40多份參選劇本中脫穎而出獲投資開拍，現時兩部作品分別已進入後期製作及籌備拍攝階段。