電影泉攻略｜Michael Keaton版蝙蝠俠 現身閃電俠最新幕後花絮 ｜EP53

王鎮泉 Jeoffrey 每星期為你提供最熱辣電影資訊，中外猛片專訪花絮上映時間全部集齊。「電影泉攻略」每周四買定爆谷陪你睇新戲。

雖然泉叔去咗新加坡，但佢仍然為大家搜羅各大電影消息！DC今年嘅大作《閃電俠》雖然仲未上映，但係已經大獲好評，喺最新釋出嘅幕後花絮入面，閃電俠仲穿越時空去咗個正義聯盟唔存在嘅世界，搵蝙蝠俠出山，當中最震撼嘅莫過於入面搵返1989年版本嘅Michael Keaton嚟演，Michael見到蝙蝠俠個場景，感動到忍唔住影低send畀當時嘅導演添布頓。

呢個星期嘅新片速遞有《蜘蛛俠：飛躍蜘蛛宇宙》，講述蜘蛛仔畀神秘力量帶入充滿各式各樣超級英雄嘅多元宇宙，蜘蛛仔仲被逼同佢哋展開大對決。《凶門惡煞》高中女生經歷喪母之痛，同身為心理治療師嘅爸爸終日喺悲傷中渡過，但某天治療師嘅病人闖入屋兼離奇慘死家中，從此充恐怖事不斷。《配樂大師：ENNIO》訪問一代電影配樂傳奇摩利哥尼，講佢傳奇嘅一生。《犯罪都市：鐵拳掃毒》馬東石飾演嘅「怪物刑警」為追捕新型毒品罪，展開韓國最大跨國毒網掃蕩行動，以拳頭當子彈嘅佢，誓死要將毒販一嘢KO。

同大家率先睇完《變形金剛：狂獸崛起》嘅幕後花絮後，再同大家睇埋本周票房龍虎榜，第三位係《銀河守護隊3》、第二位係《小魚仙》、第一位就係《狂野時速10》。