TVB熱播劇《一舞傾城》今晚（5號）劇情講到KK（陳星妤飾）收咗Marco（關楚耀飾）畀嘅500萬分手費後，決定支持俊駒（高鈞賢飾）開拍第一部電影，用咗200萬投資兼拍電影做女主角，成功憑處女作一炮而紅。
KK為咗屋企人預留儲備，決心為自己打算，由夜場轉戰電影圈，作品票房大賣，KK與俊駒去萬國城同一班姊妹慶祝，麻鷹（李嘉飾）不請自來，欲投資俊駒下一部戲洗黑錢，俊駒不知其背後目的，竟然答應與其合作，肥屍（梁焯滿飾）捉咗志飛（楊明飾）手下，志飛獨自去救人卻受傷，再次得Michelle（姚子羚飾）及時解救，志飛嘅心似有變化。 
今晚呢集講陳星妤吊威吔拍戲畫面，樣子甜美嘅星妤吊着威吔飛來飛去，其中一個鏡頭星妤從高空降落，喺上升氣流影響下，星妤晒出美腿，似足仙女下凡。TVB官方平台日前發出星妤吊威吔預告片，星妤受訪時透露吊威吔並非第一次：「之前選港姐時都吊過一次，吊威吔都幾驚㗎，但又要顧住個樣，因為要做到好Enjoy咁。」問到對拍古裝有冇興趣？星妤笑言：「我好有興趣呀！自己都好期待將來可以參演古裝片。」
此外，《一舞傾城》自播出以來深受內地網民歡迎，在微博關於「一舞傾城」話題突破4億閱讀量。其中「#一舞傾城句句誅心」話題，內容係趙碩之飾演獨力湊大仔仔嘅單親媽媽媚媚，眼見仔仔因自己舞小姐身份慘受同學欺凌，遂以「媽咪唔係雞，媽媽係兔仔」氹番仔仔，呢場戲令網友深受感動，成功勁吸逾7,700萬閱讀量。
《一舞傾城》逢周一至五晚 9 點半翡翠台播映