余慕蓮（魚毛）喺7月4號86歲生日，噚日容天佑喺社交平台上載合照，原來佢提早一個月為魚毛慶祝生日，更細心送上鮮花、蛋糕及壽桃，魚毛姐笑得開懷，另一張相見佢抿嘴看似非常感動。
魚毛喺2020年患上耳石症，因咳嗽不適入院證實患有肺纖維化，一度喺深切治療部留醫，幸好近年病情好轉，魚毛今年初出席香港演藝人協會春茗，下月就係魚毛86歲生日，容天佑提早一個月為佢慶祝，指自己喺前輩身上學到好多嘢，魚毛姐更贈咗佢一句「天佑一定天上會保佑」，容天佑祝魚毛身體健康，長命二百歲，同時希望網民留言祝福魚毛姐，相中可見魚毛精神不錯！
魚毛間中有出席朋友聚會，早前喺香港演藝人協會春茗，魚毛獲頒「傑出演藝大獎」，當時佢透露身體大不如前，現時易攰同埋咳嗽加劇，講嘢有時唔夠氣，由於肺纖維化唔能夠根治，魚毛須半年打一次標靶藥控制病情，每次3萬幾元，魚毛樂觀面對病情，每日都過得開心！