J2 旗艦綜藝節目《超級毛特兒大賽》，星期日晚播出總決賽。司儀 黃嘉雯 同 周奕瑋 加上 向海嵐 周嘉洛 同 林夏薇 等十人星級評判團選出心見中嘅超級毛特兒，薇薇仲以養眼性感晚裝亮相，大騷美好身段同靚靚鎖骨。
參與《超毛》總決賽嘅八強爭奪五個獎項，包括冠、亞、季軍、「友誼小狗」同「最上鏡超毛」獎。整晚節目色彩繽紛，八強分別以「嘉年華」、「時尚街頭」同「高級訂製服」三個系列時裝登場，又要接受「直銷商品」同「狗狗問答」兩大環節考驗。
最終冠軍由唐狗梳打奪得，Sumo同薯餅就獲得亞軍同季軍。一向以型格取勝嘅Goocha，成為「最上鏡超毛」得主；「友誼小狗」獎項就落喺嬌滴滴嘅Bubu身上。噚晚總決賽唔止溫情洋溢，亦不乏搞笑場面。喺直銷產品環節中，Jimmy為薯餅配音時，竟模仿金剛特色嘅「半鹹淡廣東話」上陣，由於維肖維妙，主持Jarvis都打趣「問」薯餅識唔識金剛本尊。
Jimmy之後解釋因為薯餅喺台灣出世，之後先被領養「移民」來港生活，所以「通曉」金剛話。雖然Jimmy表現出色又堅強，背負亡父遺願完成比賽嘅佢，最終亦淚灑錄影廠，獲周嘉洛貼心遞上紙巾兼輕拍予以安慰。
由比賽剛開始已憑「父子相」令人留下深刻印象嘅亞軍組合Kevin同Sumo，喺總決賽表現繼續優秀，以「對眼識講嘢」馳名嘅Sumo，眼神同動作都同Kevin編排嘅台辭配合得天衣無縫，尤其扮演為食樣更係超級搞笑，好似真係想將司儀手上嘅咪食落肚一樣。更成功氹到星級評判薇薇：「佢眼神好多變，頭先行Dog Walk時好不羈，但依家又變得好敦厚。」
至於冠軍阿Ken同梳打亦絕對實至名歸，主人同狗之間全程配合得天衣無縫，當梳打應阿Ken要求兩度表現「金絲雀」式翻身絕技時，可謂將全晚氣氛推向高潮，周嘉洛仲忍唔住話要「畀 10分(滿分)」。成為節目「氣氛擔當」嘅嘉洛，又被司儀Jarvis搞笑話係4位星級評判當中、最似「單身狗」嘅一位，令周嘉洛啼笑皆非。阿Ken又提到今次參賽原因，係希望大家可以對唐狗有更深入認識︰「唔好畀梳打威猛外型嚇親，佢只係一隻又貪玩、又鍾意撒嬌嘅小朋友。」