36歲鄭欣宜（Joyce）近年事業發展順利，上月喺《十大中文金曲頒獎音樂會》首奪「最優秀流行女歌手大獎」，鄭欣宜卻因身體抱恙為由而缺席頒獎禮，今日傳出欣宜疑似「失蹤」，停工近兩個月，令fans相當擔心！
今日經理人林珊珊代表Joyce向大家交代近況：「Joyce的確係病咗，療傷之中，希望大家畀多啲時間佢，其實細節，我哋就唔再透露，大家都平安，身體健康。」
之前欣宜缺席頒獎禮未有透露病情，連奪獎感言亦冇喺社交平台分享，而欣宜對上一次更新IG已係4月26號上載與髮型師Benjamin嘅合照，其後欣宜於生日5月30號亦繼續「潛水」，今日有報道稱欣宜近兩個月全面停工，愛情至上疑唔肯接job，更指連經理人公司都聯絡唔到佢，欣宜早前被捕獲與男友前往東京旅行，同行仲有其髮型師Benjamin，欣宜被傳戀情至今，一直未有正面回應，睇嚟佢非常保護呢段新戀情！ 
