TVB劇集《隱門》噚晚（21 日）播出嗰集講心月（黃智雯飾）因受唔住「衰老公」Mike（黃子恆飾）幻影糾纏企圖跳海，並向好友子喬（陳展鵬飾）還原「殺死」阿Mike經過；原來Mike於捐肝畀阿女前一晚縮沙，並責怪心月生唔到仔令甄家絕後；心月一怒之下動殺機，將番紅花加入麵包內，令Mike嚴重敏感…之後為咗妨礙子喬與Madam Yeung（湯洛雯飾）發展，又喺Madam Yeung面前刻意提起子喬前度，其間一抹奸笑盡顯機心，獲讚「眼神很有戲」。
而今晚呢集講黃智雯見陳展鵬及湯洛雯越見親密，使計令陳展鵬與前度Emma相遇，希望令陳展鵬疏遠湯洛雯，黃智雯之後再生一計，利用鄰居身上的氣味，憶起被黃子恆強姦嘅陰影，誣陷 Mike曾強姦自己搏取子喬同情
。模特兒吳沚默嘅屍體被發現，阮浩棕被懷疑錯手殺人，黃智雯向吳岱融家興師問罪，激動拿刀要吳岱融坦承陷害阮浩棕，更鬧爆吳岱融作為父親嘅種種惡行，更爆出秘密！
對於心月黑化，網民大感驚嘆，期待後續劇情更驚人發展，更期待心月大戰葉嘯天（吳岱融飾）。據知今晚（22號）呢集心月將終極暴走，為求目的不擇手段，誓要拆散子喬與Madam Yeung，全程柔弱落淚嘅心月，最終一個得逞眼神極級心寒。另一幕Mandy晒演技重頭戲，落喺與亡夫「幻影」對質場口，對鏡自言自語嘅Mandy，將心月高冷狠毒面展露無遺，演活奸角層次。
對於角色大暴走，Mandy受訪時指過程既痛苦又「歎」：「我睇劇本見到心月後面同之前咁大反差，我即刻覺得原來女人要報復起上嚟都幾恐怖。呢個角色同我以往好唔同，佢好玩在係一路呃住觀眾佢係善良嘅，但去到後段原來有咁終極嘅反擊，所以我係歎緊個角色，作為演員都會好夢寐以求做咁激烈嘅角色。」談到劇中有不少落水戲，Mandy透露：「最記得救老公嗰場落水戲喺冬天拍，當時我要著潛水衣保暖。嗰場戲講我游水好叻，但我本身唔識游水，惟有即時問武指正確游水姿勢，好彩啲人睇唔出我唔識游水。」
噚日無綫官網發放《隱門》花絮，內容圍繞麻雀館打鬥戲，參與演員有吳岱融、阮浩棕、劉佩玥（Moon）及飾演「獨耳」趙樂賢等。片段所見，唔使參與打鬥嘅Moon表現輕鬆，等埋位時更「一舞傾城」上身、搞笑地拉住趙樂賢叫 「老細」。由於打鬥重任落喺阮浩棕身上，躲埋一邊睇劇中男友努力練習及試位 ，Moon竟然大叫身痕：「之前打太多，依家冇得打好身痕！」阮浩棕笑言最難忘係「意料之外的茶几」：「去到現場見到武指準備咗用飛機木造嘅茶几，我仲覺得唔關自己事，以為係岱融哥用嚟救我，到排戲時先發現原來係用嚟打我，我當堂個心涼咗一半！拍嗰陣張茶几亦都打中咗冇保護衣嘅地方，所以花絮入面我先咁面容扭曲！」
《隱門》逢周一至五晚八點半翡翠台播映