內地大型音樂競技綜藝「浪姐」第四季今日播出第四次公演，節目三大陣營進行三輪比試，有啲成員將要暫別舞台，因此21位姐姐均全力以赴，為贏得總決賽入場券背水一戰，今集蔡少芬（Ada）聯手徐懷鈺、龔琳娜、張嘉倪及瞿穎，以魔性洗腦電音歌曲《姐姐》迎戰第四次公演「琴弦琴鍵，撒嬌撒野」舞台，一身解放美腿的短裙造型更成功掀起網上熱話！
蔡少芬曾自嘲「跳唱巨廢」，經過數個月地獄式訓練後，見佢突飛猛進，呢次佢一改前三輪公演嘅cool爆作風，決定挑戰熟女神曲《姐姐》：「因為我覺得呢首歌比較輕鬆同可愛，我本來想選《刀馬旦》，因為我現在能跳，但應該要畀更好嘅姐姐去挑選，啱唔啱？呢次我要揀可愛啲、美麗啲、活潑啲，呢啲先似我嘅作風。」
由於《姐姐》舞蹈相當繁複密集，所以五位姐姐決定先聚焦喺舞步排練，更多次安排加操，力求盡善盡美；可是佢哋喺第一次綵排卻出現忘詞、甩嘴等突發狀況，表現未如理想，仲被導演狠批「沒有綵排必要」、「浪費時間」、「完全達不到標準」，令五人陷入情緒低谷，蔡少芬坦言：「從來冇擔心過，真係想死。」蔡少芬仲一度離開排舞室獨自痛哭，最後五人喺陳嘉樺（Ella）及師姐孟佳支持下尋回自信，「姐姐的姐姐」更喺翌日化身充滿活力嘅「維他命女孩」踏上舞台，表演期間人歌合一，不但成功贏得全場掌聲，獲評審大讚係最釋放嘅一次表現！
賽後蔡少芬終於放下壓力，除咗活用「港普」積極拉票，即時大放笑彈：「我咁多次公演都冇試過像芝芙（越南選手）咁樣穿裙子、長頭髮，我似唔似芝芙嗰種美？」的確呢次蔡少芬小露蠻腰、解放絕世長腿嘅亮麗打扮，令人眼前一亮；早前有網民稱「#這背影居然是蔡少芬#」便掀起網上熱討，不少人大讚佢「身材太絕」、「保養得宜」，果然係「門面擔當」嘅蔡美麗！