《開心無敵獎門人》長老阿七婚照率先睇！宣佈8月舉行婚禮 男友容貌曝光

32歲吳嘉儀去年喺《開心無敵獎門人》擔任新長老「阿七」而為觀眾熟悉，佢畢業於第28期藝員訓練班，曾演出過多部劇集、綜藝節目，「阿七」吳嘉儀今日宣佈與男友「豬仔」Leo拉埋天窗，於今年8月13號下午舉行婚禮。

阿七罕有分享與Leo嘅婚紗相，二人拍拖以嚟一直未有高調放閃，直至結婚先公開老公仔容貌，被問到婚禮用咩形式，阿七稱要平衡家人長輩嘅意願：「上午會著裙卦做中式接新娘出門儀式，下晝做西式證婚酒會，cocktail party我哋兩個都鍾意chill啲，可以同出席嘅親友傾吓偈打卡影相。」

阿七感謝wedding planner介紹咗婚禮迎賓玩意，譬如DIY香水booth、即影即有booth、雪糕檔等，屆時仲會有TVB朋友組成嘅liveband，阿七希望來賓一齊過一個愉快嘅下晝。

阿七希望去海南島honeymoon，皆因海南島係老公「豬仔」嘅故鄉，同時可以享受陽光與海灘，而阿七父母當年都係去海南島度密月，佢又透露老公好心急計劃生B，希望趕得切生到個龍「豬」BB，

問到佢與男友最難忘嘅事係咩，阿七稱有一段長時間佢哋工作各有各忙，最珍貴嘅拍拖時間就係男友開車接送佢返工收工，阿七續道：「佢係一個100分『柴可夫』，無論我凌晨收工佢會接我，清晨返工佢會送我，我試過拍劇試過成身泥，仲要趕住去排話劇，佢都會安全送我去目的地。」

阿七笑指老公「豬仔」曾講過第時佢哋退休，就會揸住架露營車環遊世界，去唔同國家探朋友，阿七會稱永遠坐喺佢旁邊、陪住佢。