王偉仁 監製； 譚翠珊 編審嘅新劇《靈戲逼人》，將緊接《隱門》由7月3號起播出，呢部時裝靈異劇由 張振朗 龔嘉欣 劉穎鏇 阮浩棕 吳子冲 蔚雨芯 李成昌 江欣燕 謝雪心 阮嘉敏 同 魯振順 等演出。
《靈戲逼人》故事圍繞音樂人丁一駿( 張振朗 飾)、同90年代花旦雲柳芳( 龔嘉欣 飾)之間嘅人鬼淒美愛情故事。被困戲班衣箱30載嘅柳芳，因一駿一滴血而重獲自由。對死亡過程零印象嘅柳芳，「重回」人間後只係對張振朗分飾嘅昔日愛人曲行雲有依稀記憶，仲纏住同愛人撞樣 嘅一駿齊齊進行尋「雲」記。
佢哋兩個之間嘅人鬼戀包含大量笑料，當中以柳芳與世隔絕多年「破箱」而出後，鬧出嘅「尋秦記式」笑話最為啜核，無論係嘉欣「驚青式可愛」表情包，定係是振朗嘅「無限反白眼」連環爆都非常搞笑。振朗仲因為要瞞著其他人同女鬼柳芳互動、多番施展「變臉」神功，經常游走喺「激到嘔血」同「若無其事」之間，仲獲監製Simon大讚喜劇節奏極佳，仲話呢次極有可能係振朗繼《反黑路人甲》之後，又一入屋搞笑力作。
至於嘉欣飾演嘅女鬼雲柳芳除咗成日失驚無神「彈出彈入」，人設亦多元又複雜。打理家務井井有條、對一駿日常照顧周到嘅佢性格純真、樣貌可愛又心地善良；不過因為「尋雲」執念太重，不時會「跳掣」反叛任性、連番闖禍令一駿極為頭痕。
柳芳除咗一情緒激動就會發生 「電流事故」，遇到「手錶鈴聲」同「土地公公」又會有唔同反應，造型方面亦分別有大戲Look、懷舊Look同現代青春Look輪流現身。對今次扮演女鬼，嘉欣就坦言非常驚喜：「好耐冇劇集有女鬼嘅角色出現，所以聽到時都有啲驚喜。因為角色嘅設定係可愛、搞笑同埋好情深，最大難度係要諗點樣令自己冇咁恐怖！」
佢又話非常開心可以一試化粵劇妝：「化完個妝唔認得自己，有影好多相留念。最記得拍外景好熱，為免溶妝都有搵風扇吹住個妝。」據知為咗專業嘅粵劇妝容，劇組仲邀請相關專業人士操刀。
而要一人分飾兩角嘅振朗，就提到今次演出好似「人格分裂」咁喇：「兩個角色分野比較大，一個嚴肅、 一個溫柔。」佢仲搞笑指分飾兩角最大難度係洗頭：「因為丁一駿個頭髮係金金地，曲行雲就黑色嘅，所以經常性要噴黑個頭，每次洗都要洗6、7次， 仲要未必洗得甩。有時一日嘅拍攝係會由現代轉古代，古代再轉現代，咁嗰日可能就要洗成廿幾次頭！」佢今次仲會繼《堅離地愛堅離地》後再度為劇集歌曲獻聲，夥拍《聲夢傳奇》首屆畢業生 潘靜文 重新演繹林子祥嘅《似夢迷離》。
《靈戲逼人》7月3號起 星期一至五晚 20:30 翡翠台