由冼靖峰Archie 同 潘靜文Sherman 主持嘅音樂節目《J Music》，喺7月2號播出嘅一集，請嚟張敬軒擔任嘉賓，軒公除咗唱出為英國演唱會特別編製嘅 Straight forward 版《隱形遊樂場》外，佢仲應兩位主持嘅點唱要求，獻唱《百年樹木》同《俏郎君》，之後又送上三首翻唱作品《夜機》、《完全因你》同《不捨也為愛》，令在場眾人聽出耳油。
對於再次現身無綫節目「獻聲」，軒公話感覺就好似返屋企一樣：「我喺TVB長大，今次嚟好似返咗屋企咁。」講到翻唱《夜機》同《不捨》嘅原因，軒公透露張媽媽曾經喺廣州經營卡拉 ok 生意，自己十幾歲嘅時候，每逢星期六晚都會喺嗰度唱歌，而軒公指《夜機》就係自己第一首唱嘅歌。軒公繼續指自己喺青春期仲未正式變聲前，基本上都只係適合唱女歌手嘅歌，當時就發現自己嘅聲線同陳慧嫻好夾。至於翻唱《不捨》，軒公就指同當年要離開成長地廣州、嚟到香港工作有關。
喺節目中無所不談嘅軒仔，透露與音樂監製 Johnny Yim 近日完成咗三首新作，並會喺稍後推出。面對軒公嘅大駕光臨，兩位主持就好似小Fans咁雀躍，Archie 更獻唱咗當年喺《聲夢傳奇》內其中一首比賽歌曲《櫻花樹下》，畀軒公即席點評。
由於Archie全程相當靦腆，軒公就主動同佢握手予以鼓勵，當軒公用心聽畢後，除咗讚Archie有進步後，仲笑指Archie係個冧女王：「老手！一聽就知佢唱呢隻歌冧女。」之後軒仔仲即場調教 Archie唱「去蕪存菁」版《櫻花樹下》，想知 Archie 經軒公指點後唱功會變成點？記得收睇《J Music》！
《J Music》逢星期日 22:30 翡翠台
