新一輯旅遊節目《請1日假去旅行》逢周四、五晚上 10 點半翡翠台播映。本周播出「澳門篇」，由麥美恩（Mayanne）、許文軒（Edmond）、林秀怡及曾展望（GM）擔任主持。
今晚（30日）播出「澳門篇」最後一集，首個行程已相當刺激，四人去澳門旅遊塔挑戰被列入健力士世界紀錄嘅「全球最高商業笨豬跳」高達233米，下降最高速度為200km/h。麥美恩今次撇低緋聞男友 Edmond，攬住小鮮肉GM玩雙人笨豬跳，麥美恩笨豬跳期間無厘頭大嗌「曾志偉」，玩完之後更笑言係「人生最漫長5秒」。林秀怡則單拖上陣笨豬跳，起初驚到狂嗌No，最終突破心理關口一躍而下。晚上四人大歎澳門特色菜，品嚐中菜西煮嘅美食。
澳門遊最後一日，GM首先帶隊去澳門特色茶記食早餐，之後去關前街閒逛，麥美恩同林秀怡睇Vintage名牌包包，許文軒同GM去睇衫。行完街後，麥美恩同許文軒喺戀愛巷合體瘋狂派心心放閃。四人午餐品嚐號稱全澳門最多食物種類嘅自助餐，該處共有18個美食區域，相當誇張！
今集再有Plan A及Plan B推介畀觀眾，Plan A係去全澳門最大嘅VR主題樂園玩，麥美恩、許文軒及林秀怡挑戰場內皇牌機動遊戲，三人置身360度大迴環轉來轉去嘅機器中，望落相當刺激。Plan B就係CP值極高嘅High Tea體驗，328澳門元嘅雙人份下午茶除咗有美食，仲有空中海洋 Show欣賞，「飛天海豚」定時喺場內飛來飛去。四位主持High Tea期間，突然有一隻「飛天海豚」為Mayanne送上戒指，引起全場哄動！最後一餐晚餐，四人選擇去澳門第一間Wine On Tap 餐廳開餐，特色係食客可以喺3粒鐘內任飲24款紅白葡萄酒，價錢由288澳門元起跳。
《請 1 日假去旅行》逢周四、五晚 10 點半翡翠台播映