今個月27號係陳奕迅（Eason）四十九歲生日，噚日佢喺香港與數百歌迷聚會，歌迷提早為Eason慶祝生日，Eason下星期將前往台北小巨蛋開7場演唱會，八月底赴北美巡迴6站，更成為首位喺三藩市Chase Center舞台上獻唱嘅亞洲歌手，為華人歌手開創新歷史。
據知是次Eason去北美巡唱將帶140人大隊出發，於8月底以一個月時間，喺紐約、洛杉磯、三藩市、芝加哥、溫哥華及多倫多六大城市舉行演唱會，並把最大Video Wall飄洋過海帶去美加，希望為美加觀眾帶來跟香港一樣原汁原味嘅視覺體驗。Eason直言是次美加演唱會嘅場地，有啲大場館係第一次到訪，所以心情既緊張又興奮，而每站video wall都以香港原版作藍本。
據知Eason美加演唱會，內部認購反應熱烈，6站巡演將喺北美時間7月14日，於6個城市同步開售，買飛嘅北美歌迷就要密切留意。 噚日歌迷聚會上，唔少歌迷向Eason表示會飛台北睇騷，令Eason十分驚訝，歌迷詢問Eason美加之外，係咪仲有其他站？Eason笑言：「有傳聞係話囉，傳聞由佢傳吓先啦，總有「近近地」地方，個度實會做，點會唔做？不過大家唔好信傳聞消息，等留意官方公告，唔好亂信非官方單位代購門票，否則容易受騙。」
歌迷聽到有「近近地」地方即響起開心歡呼聲，Eason噚日已提早砌四個蛋糕，兩款係他最喜愛嘅味道，另外一個係佢最喜愛嘅網球造型蛋糕，又有一個係燒味砌成嘅蛋糕，創意十足，Eason開心地不停影啲蛋糕，吹蠟燭許願後，Eason第一時間把燒鵝髀拉出嚟即食。至於生日願望，Eason笑謂:「講出來就唔靈啦，其實人越大，佢自認追求越少，最希望都係身體健康，同之後巡迴演出順順利利，如果可以再貪心，老土啲就希望世界可以和平健康，冇戰爭與疾病。」 歌迷噚日送咗唔少禮物，例如歌迷為佢喺加拿大ALBERTA(艾伯塔)種49棵樹，慶祝佢嚟緊49歲生日，又有來自世界各地歌迷拍影片祝福，承諾永遠支持做Eason嘅後盾。
每位入場歌迷各自寫一封信給偶像，大家將信件通通放入「係咁咦」大利是封之中送畀Eason，Eason現場整個人捐山窿咁，捐入大利是封裡面抽出歌迷信嚟讀，場面非常搞笑有趣。歌迷會歡聚近4粒鐘，Eason不只與歌迷玩遊戲，又吹水又合照，令歌迷開心到飛起。
Eason答應歌迷一定睇晒佢哋啲信：「我會返去慢慢睇，我會開心好耐，因為好耐冇咁近距離見大家，好耐冇同咁多人吹水，我會將呢個開心帶去台北，今日攞晒你哋啲力量，到時你哋發覺陳奕迅喺台北唱得幾好喎，你哋就知道，係你有份畀力量我！本來就去台北，心情都好緊張，而家冇咁緊張啦....多謝大家！」 此外，好友葛文輝亦前來參予佢嘅生日會，現場為香港歌迷做開箱，第一次展示由佢幫忙設計Fear and Dreams 演唱會重量級紀念特集BOX SET，葛文輝表示，呢個BOX SET將作限量出售。
