每集都會邀請高顏值、高人氣KOL擔任導遊，為觀眾推介當地最新、最潮、最好玩景點嘅《DM旅戲遊》。 星期四一集將邀請《國際華裔小姐2019》冠軍 張簡寧 擔任嘉賓，東道主Jens帶領兩位J2er主持 倪嘉雯同 葉靖儀 展開摘星之旅，食盡價錢貼地嘅米芝蓮美食。
三位靚女大歎肉骨茶同拿督燒肉之餘，最正一餐可能係同香港食車仔麵一樣、可以自由選擇食材配搭嘅海鮮粉，當中以巨型老虎蝦最令人大流口水，Size足足有成條手臂咁長。
食完好西後，Carmen同Michelle就獻出人生啪骨初體驗， 師傅幫佢哋Lock頸時發出嘅巨響，仲嚇到Michelle花容失色，Carmen分享感受時話：「嗰啲啪啪聲好似好痛咁，但啪完之後真係鬆咗！」而Michelle則指啪骨感覺好奇妙：「好似身體入面有啲嘢釋放咗出嚟。」
至於星期五一集，就有復古女神 陳祖琳 擔任嘉賓，只得19歲嘅Jolyn仲係學生一名，但係同時係當地觀察類真人騷《The Fabulous》嘅參賽者。Jolyn雖然年紀輕輕，但就非常鍾情懷舊事物，今次仲會同兩位主持展開復古之旅。
第一站佢哋就齊齊去旗袍專門店揀心水旗袍，化身真．復古女神上演小劇場《丫鬟傳》，場面搞笑！呢間鋪頭嘅旗袍價錢仲相當親民， 只需約200到300馬來西亞令吉(約360至540港元）不等。之後又到訪百年咖啡店、 百年老茶行仲有百年中式餅店等，Jolyn仲教大家自拍必勝法，想知秘訣係乜？記得留意節目教路喇。
《DM旅導遊》星期一至五晚 22:30 J2