TVB熱播劇《靈戲逼人》噚晚（12號）嗰集最精彩就係葉敏敏（劉穎鏇飾）及阿東（阮浩棕飾）為咗幫Ivan（張振朗飾）向Eric（李日朗飾）報仇，派出敏敏色誘Eric，借故埋身後再以「假錄音電話」作餌，等Eric放下戒心，之後再由敏敏以激將法刺激Eric自爆「渣男真相」……最終幾經轉折，Eric惡行喺網上公諸於世，惡人有惡報身敗名裂，整個劇情大快人心！
平時多飾演乖乖女嘅Tiffany，是次挑戰「戲中戲」飾演電力十足嘅夜蒲索女，身穿貼身上衣加短裙嘅Tiffany，無論肢體動作或眉頭眼額均盡顯嫵媚，加上連串 「港女式」撒嬌表情，新鮮感爆燈。Tiffany坦言為咗呢場戲做足功課，並為角色定位傷盡腦筋：「我有睇唔同嘅電影去攞靈感，學吓各種唔同嘅所謂放電方法， 睇吓點樣做最舒服、最符合劇情；主要唔想太誇張，因為始終我個角色比較簡單，唔係壞女孩，而係戲中戲。」
談到與李日朗（Don）喺相關場口有不少親密互動，Tiffany透露拍攝時零尷尬，皆因「大腦很忙」，亦因為Don係一位好拍檔：「Don好Nice，好肯同我溝通，佢所有嘢都會問過我o唔ok先做，大家建立咗信任就令我好放心；加上嗰晚我成個腦都喺度諗點樣做先至有說服力，所以都冇特別話尷唔尷尬。我成日覺得如果雙方都唔尷尬，成件事會拍得更加好。」
Don獲Tiffany讚不絕口、在劇中飾演「世一渣男」，阿Don指摸Tiffany大髀比起與蔚雨芯拍床戲更有壓力， Don坦言要喺Tiffany裙入面攞部電話出嚟：「因為個電話喺裙入面我睇唔到，都係要靠估先攞得番出嚟。」 Don透露每次拍親熱戲前，一定先「君子後小人」：「我會先好有禮咁講聲唔好意思先， 跟住就拍。」
《靈戲逼人》逢周一至五晚 8 點半翡翠台播映